Samarqand viloyatining Urgut tumanidagi erkin iqtisodiy zona hududidan 1 gektar yer ajratib berish evaziga 30 ming dollar talab qilgan tuman hokimligi Sanoatni rivojlantirish, kapital qurilish, kommunikatsiyalar va kommunal xo‘jalik masalalari bo‘yicha o‘rinbosari kotibiyati xodimi qo‘lga olindi. Bu haqda “Daryo”ga viloyat prokuraturasi ma’lum qildi.
Ma’lum bo‘lishicha, fuqaro I.S. DXX viloyat boshqarmasiga ariza bilan murojaat qilib, Urgut tuman hokimligi xodimi N.Sh. va uning sherigi N.I.lar erkin iqtisodiy zona hududidagi mavjud zaxira yer maydonidan 1 gektar yer maydoni ajratib berishi evaziga 30 ming dollar talab qilayotganini bildirgan.
Samarqand viloyat prokuraturasi, DXX va Bosh prokuratura huzuridagi iqtisodiy jinoyatlarga qarshi kurashish departamenti hamkorligida 2021-yilning 20-yanvar kuni o‘tkazilgan tezkor tadbirda N.Sh. hokimlik binosi yonida o‘ziga tegishli Lacetti’da sherigi N.I. bilan I.S.dan oldindan kelishilgan 30 ming dollarning 15 ming dollarini olayotgan vaqtida ashyoviy dalillar bilan ushlangan.
Hodisa joyini ko‘zdan kechirish davomida avtomashina “bardachogi”dan yana 10 ming dollar, N.I.ning cho‘ntagidan esa 5 ming dollar ham topilib, ashyoviy dalil sifatida olingan.
Departamentning Samarqand shahar bo‘limi tomonidan fuqaro N.Sh. va N.I.larga nisbatan Jinoyat kodeksining 168-moddasi 4-qismi “a” bandi (juda ko‘p miqdorda firibgarlik) 28, 211-moddasi 3-qismi “a” bandi (juda ko‘p miqdorda pora berish) bilan jinoyat ishi qo‘zg‘atilib, dastlabki tergov harakatlari olib borilmoqda.
Izoh (0)