O‘zbekistonga 2020-yilda 50,4 million dollarlik gaz import qilingan, bu 2019-yilga nisbatan 237 marta ko‘proq. Eksport esa qiymat jihatidan 4,7 baravar kamaygan. Bu haqda Davlat statistika qo‘mitasining yillik tashqi savdo aylanmasi to‘g‘risidagi hisobotida aytilgan.
“Gazeta.uz”ning ma’lum qilishicha, gaz Turkmanistondan sotib olingan. Gaz eksporti qiymati bo‘yicha 4,7 baravarga, ya’ni 2,2 milliard dollardan 478,1 million dollarga kamaydi. Bu Rossiyaga gaz eksportining to‘xtatilishi, shuningdek, koronavirus pandemiyasi sharoitida Xitoyga yetkazib berish hajmining uch baravar kamayishi tufayli yuz berdi. Noyabr oyi oxirida “Lukoyl” O‘zbekistondagi loyihalarda gaz qazib olishni loyihalash darajasida deyarli to‘liq tiklaganligi ma’lum bo‘ldi.
Davlat statistika qo‘mitasi ma’lumotlariga ko‘ra, 2020-yilda O‘zbekistonda gaz qazib olish hajmi o‘tgan yilga nisbatan 10,8 milliard kubometrga yoki 17,8 foizga, ya’ni 60,5 milliarddan 49,7 milliard kubometrgacha kamaydi.
Prezident Shavkat Mirziyoyev 16-dekabr kuni O‘zbekistonda kuniga 20 million kub metr gaz taqchilligi borligini aytdi. Davlat rahbari gaz eksporti hajmini kamaytirishni buyurdi, shu sababli qo‘shimcha ravishda 7-8 million kubometr gaz aholi ehtiyojlariga yo‘naltirilishi ta’kidlandi.
“Interfaks”ning ma’lum qilishicha, 2020-yil boshidan beri Rossiyaning “Gazprom” kompaniyasi O‘zbekistondan deyarli hech qanday tabiiy gaz sotib olmagan. 2020-yilning 6 oyi davomida kompaniya O‘zbekistondan import hajmi nolga teng bo‘lgani to‘g‘risida xabar bergan bo‘lsa, 2020-yilning 9 oyi davomida esa 20 million kubometr o‘zbek yoqilg‘isini sotib olgani to‘g‘risida ma’lum qilgan. 2019-yilda “Gazprom” O‘zbekistondan 7,6 milliard kubometr gaz sotib olgan edi.
2021-yilgi Davlat dasturi loyihasiga ko‘ra, 1 martdan boshlab suyultirilgan gaz olib kirish bojini bekor qilish va elektr hamda gaz ulgurji bozorini yaratish rejalashtirilgan. Yirik korxonalar energiya manbalarini import qilish huquqini olishlari mumkin.
Avvalroq O‘zbekistondagi 300 dan ortiq maktab qo‘lbola pechlar yordamida isitilayotgani, O‘zbekistonda aholi xonadonlari is gazini erta aniqlaydigan gazoanalizatorlar bilan jihozlanishi hamda O‘zbekiston gaz-zapravkalari sutkasiga yana 24 soatdan ishlay boshlagani haqida xabar berilgandi.
Izoh (0)