O‘zbekistonda aholi xonadonlariga is gazini erta aniqlaydigan gazoanalizatorlar o‘rnatilishi mo‘ljallanmoqda. Bu haqda “Yoshlarni qo‘llab-quvvatlash va aholi salomatligini mustahkamlash yili”da amalga oshirishga oid davlat dasturi loyihasida aytilgan.

O‘zbekiston Prezidenti qarori loyihasi ishlab chiqiladi. Loyihada:

  • yong‘in xavfsizligini ta’minlashning yangi tizimini joriy etish, sohaning moddiy-texnik bazasini va kadrlar salohiyatini tubdan mustahkamlash;
  • aholi xonadonlarini metan, propan va is gazini barvaqt aniqlaydigan, xabar beradigan va gazni tarmoqdan klapan orqali uzib qo‘yadigan gazoanalizatorlar bilan ta’minlashni tashkil etish;
  • yangi turar joy majmualari qurilgan, ma’muriy markazdan uzoqda joylashgan hamda yong‘inlarni tezkor bartaraf etish imkoniyati cheklangan hududlarda qo‘shimcha ajratiladigan shtat birliklari hisobiga yong‘in-qutqaruv qismlari (postlari)ni tashkil etish;
  • yong‘in xavfsizligini ta’minlash tizimining samaradorligini yana-da oshirish bo‘yicha kompleks chora-tadbirlar dasturini tasdiqlash;
  • yong‘in-qutqaruv sportini rivojlantirish va ommalashtirish nazarda tutiladi.

Bu ishlarni bajarish muddati 2021-yil 1-mart etib belgilangan. Ijro uchun Favqulodda vaziyatlar vazirligi, Energetika vazirligi, Qurilish vazirligi, Iqtisodiy taraqqiyot vazirligi, Moliya vazirligi, Jismoniy tarbiya va sport vazirligi, manfaatdor vazirlik va idoralar, Qoraqalpog‘iston Vazirlar Kengashi, viloyatlar va Toshkent shahar hokimliklari mas’ul etib belgilangan.

Avvalroq Kattaqo‘rg‘onda is gazidan oilaviy zaharlanish oqibatida uch nafar bola, Sirdaryoda er-xotin is gazidan zaharlanish oqibatida vafot etgani hamda Qarshida gaz portlashi oqibatida ikki kishi halok bo‘lib, binoning bir qismi qulab tushgani haqida xabar berilgandi.