Qashqadaryo viloyatining Qarshi shahrida farzandlarini o‘ldirish bilan qo‘rqitib, ularni “harom bola” deb atagan ota qamoqqa olindi. Bu haqda “Daryo”ga viloyat prokuraturasi axborot xizmati rahbari Jasur Shukurov ma’lum qildi.
Ta’kidlanishicha, ijtimoiy tarmoqlarda tarqalgan videoda otasi tomonidan qo‘rqitilgan bolalar bilan viloyat prokurori Erkaboy Tojiyevning shaxsan o‘zi uchrashgan.
Aniqlanishicha, Qarshi shahrida yashovchi fuqaro A.R. voyaga yetmagan farzandlarini o‘ldirish bilan qo‘rqitib, haqoratlab, tazyiq o‘tkazgan va buni onasiga ko‘rsatish uchun tasvirga olgan.
“Bugun, 21-yanvar kuni viloyat prokurori Erkaboy Tojiyev voyaga yetmagan Ax.J. va Ad.J.ni buvisi M.X. bilan birga viloyat prokuraturasiga taklif qildi va ular bilan suhbatlashdi”, — deydi Jasur Shukurov.
O‘tkazilgan suhbat jarayonida voyaga yetmagan shaxslar otasi tomonidan muttasil qiynab, urib, haqoratlab kelingani aniqlangan.
Mazkur holat yuzasidan shu kunning o‘zida Jinoyat kodeksining 110-moddasi 2-qismi “a” bandi (voyaga yetmagan shaxslarni qiynash) bilan jinoyat ishi qo‘zg‘atilib, A.R. qamoqqa olingan. Shuningdek, bolalar ijtimoiy himoyaga olinib, tergov harakatlari yuzasidan nazorat o‘rnatilgan.
Izoh (0)