Toshkent shahar Ichki ishlar bosh boshqarmasi poytaxtda kuchli shamol bo‘lishi kutilayotgani sababli aholidan ehtiyot choralarini ko‘rishni so‘radi.
FVV xabariga ko‘ra, O‘zbekistonning shimoliy hududlarida kuchli qor yog‘ib, havo harorati keskin pasaygan. Yaqin sutka ichida poytaxtda ham havo harorati pasayishi va shamol kuchayishi kutilmoqda.
IIBB xabarida mulkka ziyon yetishining oldini olish uchun daraxtlar tagida va reklama ustunlari yaqinida qoldirilgan avtomobillarni xavfsizroq joyga qo‘yish so‘ralgan.
Shuningdek, uy derazalarni mahkam yopish, tashqi tokchadan gultuvaklar va boshqa buyumlarni olib qo‘yish tavsiya etilgan. Bundan tashqari, elektr bilan bog‘liq uzilishlar yuzaga kelgan taqdirda maishiy elektr uskunalarni elektr tarmog‘idan uzib qo‘yish kerakligi eslatib o‘tilgan.
“O‘zgidromet” 22-yanvar kuni respublika hududlari bo‘yicha yog‘ingarchilik (yomg‘ir, qor) bo‘lishi, tog‘oldi va tog‘li hududlarda qor, ba’zi joylarda kuchli qor yog‘ishi, Qoraqalpog‘istonda hamda Xorazm viloyatida yog‘ingarchilik kutilmasligini ma’lum qilgandi. 21—22-yanvar kunlari esa shamol 17-22 metr/sekundgacha kuchayishi kutilyapti, ba’zi joylarda 25-28 metr/sekundgacha yetishi mumkin.
Avvalroq FVV Qamchiq dovonida kuchli qor yog‘ishi kutilayotgani sabab haydovchilarni ogohlantirgan edi.
Izoh (0)