Indoneziyaning Sulavesi orolidagi zilzila va Kalimantandagi suv toshqinlari oqibatida halok bo‘lganlar soni 96 kishiga yetdi, 70 mingga yaqin odam o‘z uylarini tark etishga majbur bo‘lgan. Bu haqda mamlakat Tabiiy ofatlarga qarshi kurash milliy agentligiga tayanib “RIA Novosti” xabar berdi.
Avvalroq Indoneziyadagi zilzilada halok bo‘lganlar soni 56 kishiga yetgani to‘g‘risida xabar berilgandi.
Agentlik ma’lumotlarga ko‘ra, 81 kishi G‘arbiy Sulavesida kuzatilgan 6,2 magnitudali zilzila oqibatida halok bo‘lgan, yana 15 kishi esa Janubiy Kalimantan provinsiyasidagi suv toshqinlari qurboniga aylangan.
Agentlik matbuot kotibi Radityi Jatining so‘zlariga ko‘ra, 28 mingga yaqin odam uylarini tark etib, G‘arbiy Sulavesi provinsiyasi va Majen okrugidagi evakuatsiya markazlariga joylashtirilgan. Shuningdek, suv toshqinlaridan qochgan 40 ming kishi Janubiy Kalimantan provinsiyasiga evakuatsiya qilingan. Jatining ta’kidlashicha, zilzila oqibatida 1150 dan ortiq bino vayron bo‘lgan, jumladan, beshta maktab ham.
Janubiy Kalimantanda 25 mingga yaqin uy suv ostida qolgan. Suv toshqinlari provinsiyada 14-yanvar kungi yog‘ingarchiliklardan so‘ng boshlangan. Viloyatda favqulodda holat e’lon qilingan.
Tabiiy ofatlarga qarshi kurash milliy agentligi rahbari Doni Monardoning ma’lum qilishicha, evakuatsiya qilingan fuqarolar orasida koronavirus tarqalishining yuqori xavfi sabab rasmiylar ekspress-testlardan foydalanishga o‘tadi.
Izoh (0)