Daniyada Janubiy Afrikada aniqlangan COVID-19’ning mutatsiyaga uchragan shtammi qayd etildi. Bu haqda Berlingske nashriga tayanib “RBK” xabar bermoqda.
Virusning yuqumliroq turi Zelandiya oroli (orolning aholi zich joylashgan arxipelagi)da aniqlangan. Ushbu shtamm yaqinda Dubaydan uchib kelgan erkakda aniqlangan.
Kopengagen universiteti eksperimental virusologiya professori Alan Randrup Tomsenning so‘zlariga ko‘ra, Daniyada COVID-19 mutatsiyasi bemavrid paydo bo‘ldi.
“Epidemiya nuqtayi nazaridan bizda bu turdagi virusning paydo bo‘lishi uchun juda yomon vaqt, chunki unda ‘britancha’ shtammning ayrim xususiyatlari bor. Biz ayni paytdagi holatimizni yanada qiyinlashtirishni xohlamaymiz”, — degan Tomsen.
Olim Janubiy Afrikadan kelgan koronavirus mutatsiyasi COVID-19’ning “britancha” shtammi kabi juda yuqumli ekanligini tasdiqladi. Biroq virusning ushbu turi odatdagi virusdan qanchalik tezroq tarqalishi mutaxassislarga hozircha noma’lum. Shunga qaramay, Tomsenning fikricha, Janubiy Afrika shtammining paydo bo‘lishi Daniyada kasallikning qaytadan avj olishiga olib kelmaydi.
Mamlakatda dekabr oyi oxirlarida koronavirusning “britancha” shtammi aniqlangandi.
Jons Hopkins universiteti ma’lumotlariga ko‘ra, 17-yanvar holatiga ko‘ra Daniyada 189 mingdan ortiq kishida COVID-19 aniqlangan. Ularning 169 mingdan ortig‘i sog‘aygan, 1,7 mingdan ortig‘i vafot etgan.
Avvalroq Britaniyada koronavirusning “braziliyacha” shtammi aniqlangani haqida xabar berilgan edi.
Izoh (0)