Индонезиянинг Сулавеси оролидаги зилзила ва Калимантандаги сув тошқинлари оқибатида ҳалок бўлганлар сони 96 кишига етди, 70 мингга яқин одам ўз уйларини тарк этишга мажбур бўлган. Бу ҳақда мамлакат Табиий офатларга қарши кураш миллий агентлигига таяниб «РИА Новости» хабар берди.
Аввалроқ Индонезиядаги зилзилада ҳалок бўлганлар сони 56 кишига етгани тўғрисида хабар берилганди.
Агентлик маълумотларга кўра, 81 киши Ғарбий Сулавесида кузатилган 6,2 магнитудали зилзила оқибатида ҳалок бўлган, яна 15 киши эса Жанубий Калимантан провинциясидаги сув тошқинлари қурбонига айланган.
Агентлик матбуот котиби Радитйи Жатининг сўзларига кўра, 28 мингга яқин одам уйларини тарк этиб, Ғарбий Сулавеси провинцияси ва Мажен округидаги эвакуация марказларига жойлаштирилган. Шунингдек, сув тошқинларидан қочган 40 минг киши Жанубий Калимантан провинциясига эвакуация қилинган. Жатининг таъкидлашича, зилзила оқибатида 1150 дан ортиқ бино вайрон бўлган, жумладан, бешта мактаб ҳам.
Жанубий Калимантанда 25 мингга яқин уй сув остида қолган. Сув тошқинлари провинцияда 14 январь кунги ёғингарчиликлардан сўнг бошланган. Вилоятда фавқулодда ҳолат эълон қилинган.
Табиий офатларга қарши кураш миллий агентлиги раҳбари Дони Монардонинг маълум қилишича, эвакуация қилинган фуқаролар орасида коронавирус тарқалишининг юқори хавфи сабаб расмийлар экспресс-тестлардан фойдаланишга ўтади.
Изоҳ (0)