Huawei’ning sho‘ba brendi mustaqil kompaniyaga aylandi va shu sababli endilikda AQSh sanksiyalari unga ta’sir qilmaydi. Bu esa Google servislari hamda boshqa xorij texnologiyalaridan foydalanish imkonini beradi, deb yozadi Hi-Tech.Mail.ru.
2020-yilning noyabr o‘rtalarida Huawei kompaniyasi o‘zining Honor brendini 30 dan ortiq kompaniyalarni o‘zida birlashtirgan Shenzhen Zhixin New Information Technology Co. konsorsiumi sotib olganini rasman e’lon qilgandi. “Kommersant” nashrining yozishicha, 2021-yilning bahoridan boshlab Rossiya bozorlarida Google servisiga ega ilk Honor smartfonlari paydo bo‘ladi.
Hozircha Honor’ning yangi qurilmalari haqida batafsil ma’lumotlar yo‘q, ushbu smartfonlar narxi qancha bo‘lishi ham noma’lum. Shuningdek, kompaniya sanksiyalar ostida bo‘lganida ishlab chiqarilgan smartfonlar taqdiri qanday kechishi ham ma’lum emas. Kompaniya vakillari ushbu yangilikka izoh bermagan.
Huawei o‘z brendi sotilishining asosiy muammosi sifatida ehtiyot qismlari, texnologiyalar, litsenziyalar va boshqa ishlab chiqaruvchilarning dasturiy ta’minotlaridan foydalanish imkoniyatini ko‘rsatgan. Muammolar 2019-yilda, AQShning Xitoy bilan savdo urushi doirasida mamlakatdagi kompaniyalarga sanksiya qo‘llaganida boshlangan, o‘shandan buyon ishlab chiqaruvchi ARM arxitekturasidan, Google servislaridan foydalana olmayapti va Amerika kompaniyalari bilan savdo qilish huquqidan butunlay mahrum bo‘lgan.
Avvalroq Qualcomm Trampning taqiqiga qaramay Huawei kompaniyasiga 4G-protsessorlarni sotishi ma’lum bo‘lgandi.
Izoh (0)