Honor смартфонларига Google сервислари қайтади
Huawei’нинг шўъба бренди мустақил компанияга айланди ва шу сабабли эндиликда АҚШ санкциялари унга таъсир қилмайди. Бу эса Google сервислари ҳамда бошқа хориж технологияларидан фойдаланиш имконини беради, деб ёзади Hi-Tech.Mail.ru.
2020 йилнинг ноябрь ўрталарида Huawei компанияси ўзининг Honor брендини 30 дан ортиқ компанияларни ўзида бирлаштирган Shenzhen Zhixin Nеw Information Technology Cо. консорсиуми сотиб олганини расман эълон қилганди. «Коммерсантъ» нашрининг ёзишича, 2021 йилнинг баҳоридан бошлаб Россия бозорларида Google сервисига эга илк Honor смартфонлари пайдо бўлади.
Ҳозирча Honor’нинг янги қурилмалари ҳақида батафсил маълумотлар йўқ, ушбу смартфонлар нархи қанча бўлиши ҳам номаълум. Шунингдек, компания санкциялар остида бўлганида ишлаб чиқарилган смартфонлар тақдири қандай кечиши ҳам маълум эмас. Компания вакиллари ушбу янгиликка изоҳ бермаган.
Huawei ўз бренди сотилишининг асосий муаммоси сифатида эҳтиёт қисмлари, технологиялар, лицензиялар ва бошқа ишлаб чиқарувчиларнинг дастурий таъминотларидан фойдаланиш имкониятини кўрсатган. Муаммолар 2019 йилда, АҚШнинг Хитой билан савдо уруши доирасида мамлакатдаги компанияларга санкция қўллаганида бошланган, ўшандан буён ишлаб чиқарувчи ARM архитектурасидан, Google сервисларидан фойдалана олмаяпти ва Америка компаниялари билан савдо қилиш ҳуқуқидан бутунлай маҳрум бўлган.
Аввалроқ Qualcomm Трампнинг тақиқига қарамай Huawei компаниясига 4G-процессорларни сотиши маълум бўлганди.
