AQSh FQB Kapitoliyga hujum ishtirokchilarining chet eldan moliyalashtirilgani ehtimolini tekshirmoqda

Amerika Federal qidiruv byurosi (FQB) 6-yanvar kuni Vashingtondagi Kapitoliyga hujumni rejalashtirgan va uyushtirgan ekstremistlarni moliyalashtirgan manbalarni o‘rganishni boshladi, deb yozadi “RBK”. Bu haqda NBC telekanali FQBning amaldagi va sobiq xodimlariga tayanib xabar bergan.

FQB Kongress binosiga hujum qilganlarga chet eldan mablag‘lar ko‘chirib berilgani ehtimoli bilan qiziqib qolgan. Xususan, gap Kapitoliyga hujum oldidan o‘ta o‘ng faollarga bitkoinda ko‘chirib berilgan 500 ming dollar haqida bormoqda. NBC manbalariga ko‘ra, o‘tkazma Fransiya fuqarosi tomonidan amalga oshirilgan.

Tekshiruv boshlanishiga AQShdagi siyosiy ekstremistlarga Rossiya, Eron va Xitoy tomonidan ta’sir o‘tkazilgani haqidagi gumonlar ham sabab bo‘lgan. Bu mamlakatlar, NBC manbalari aytishicha, AQShdagi vaziyatdan o‘z manfaatlari yo‘lida foydalanmoqda. Ammo FQB Vashingtonda 6-yanvardagi tartibsizliklarga homiylik qilgan deb o‘ylamaydi.

Ammo kriptovalyuta o‘tkazmalari byuroning Amerikadagi siyosiy jarayonlarga xorijning ehtimoliy aralashuvi yuzasidan tekshiruv boshlashiga qo‘shimcha turtki bo‘lgan.

Avvalroq pul “yuvish”ga qarshi kurash bo‘yicha dasturiy ta’minot ishlab chiquvchisi Chainanalysis Kapitoliyga hujum uyushtirilishidan bir oy avval amerikalik o‘ta o‘ng faollar bitkoinda qariyb 522 ming dollar miqdorida yirik xayriyani qo‘lga kiritganini ma’lum qilgandi.

O‘tkazma 2020-yil 8-dekabr kuni 22 ta elektron hamyonga amalga oshirilgan, ularning ko‘pchiligi o‘ta o‘ng faollarga tegishlidir. Xususan, Groypers o‘ta o‘ng guruhi yetakchisi Nik Fuentes 250 ming dollarga ega bo‘lgan. U 6-yanvar kuni amaldagi prezident Donald Trampni qo‘llab-quvvatlab o‘tkazilgan mitingda qatnashgan, keyin esa hujum boshlangan vaqtda Kongress binosida ham bo‘lgan.

Chainanalysis xabariga ko‘ra, ismi oshkor etilmagan fransiyalik dasturchi amalga oshirgan. Shundan keyin Fransiyaning 20 minutes nashri 35 yoshli fransiyalik IT mutaxassisi mablag‘ni o‘z joniga qasd qilishdan oldin o‘tkazganini aniqladi.

Axloq nuqtayi nazaridan nashr xayriyachining ism-sharifini oshkor qilmayapti. Ammo u fransuzning o‘limidan keyin uning blogida avtomatik tarzda e’lon qilingan o‘limidan oldin yozilgan xatini keltirib o‘tdi. Unda aytilishicha, dasturchi so‘nggi sakkiz yildan buyon salomatligi bilan bog‘liq muammolardan azob chekkan, oxirgi paytlarda esa og‘ir depressiyaga uchragan. Shu munosabat bilan u hayotni tark etishga, “arzimas boyligini esa muayyan maqsadlarga va muayyan odamlarga meros qoldirishga” qaror qilgan.

6-yanvar kuni Trampni qo‘llab-quvvatlab o‘tkazilgan mitingdan keyin uning ishtirokchilari Kapitoliy hududiga bostirib kirdi va Jo Baydenni saylangan davlat rahbari etib tasdiqlash haqidagi Kongress majlisi bo‘lib o‘tayotgan bino ichkarisiga kirib oldi. Shiddatli hujum oqibatida besh kishi halok bo‘ldi, ular orasida bir politsiyachi bor. Namoyishchilar quvib yuborilganidan keyin AQSh hukumati ichki terrorizm haqida o‘nlab jinoyat ishlarini qo‘zg‘atdi va 100 dan ortiq tartibsizlik ishtirokchilarini qo‘lga oldi.

Bayden Kapitoliyga hujum va Vashingtondagi tartibsizliklar siyosiy ekstremistlar tomonidan rejalashtirilganini, ularni esa Tramp gijgijlaganini aytdi. Shu munosabat bilan Kongressning Vakillar palatasi amaldagi prezidentga impichment e’lon qildi.