АҚШ ФҚБ Капитолийга ҳужум иштирокчиларининг чет элдан молиялаштирилгани эҳтимолини текширмоқда

Америка Федерал қидирув бюроси (ФҚБ) 6 январь куни Вашингтондаги Капитолийга ҳужумни режалаштирган ва уюштирган экстремистларни молиялаштирган манбаларни ўрганишни бошлади, деб ёзади «РБК». Бу ҳақда NBC телеканали ФҚБнинг амалдаги ва собиқ ходимларига таяниб хабар берган.

ФҚБ Конгресс биносига ҳужум қилганларга чет элдан маблағлар кўчириб берилгани эҳтимоли билан қизиқиб қолган. Хусусан, гап Капитолийга ҳужум олдидан ўта ўнг фаолларга биткоинда кўчириб берилган 500 минг доллар ҳақида бормоқда. NBC манбаларига кўра, ўтказма Франция фуқароси томонидан амалга оширилган.

Текширув бошланишига АҚШдаги сиёсий экстремистларга Россия, Эрон ва Хитой томонидан таъсир ўтказилгани ҳақидаги гумонлар ҳам сабаб бўлган. Бу мамлакатлар, NBC манбалари айтишича, АҚШдаги вазиятдан ўз манфаатлари йўлида фойдаланмоқда. Аммо ФҚБ Вашингтонда 6 январдаги тартибсизликларга ҳомийлик қилган деб ўйламайди.

Аммо криптовалюта ўтказмалари бюронинг Америкадаги сиёсий жараёнларга хорижнинг эҳтимолий аралашуви юзасидан текширув бошлашига қўшимча туртки бўлган.

Аввалроқ пул «ювиш»га қарши кураш бўйича дастурий таъминот ишлаб чиқувчиси Chainanalysis Капитолийга ҳужум уюштирилишидан бир ой аввал америкалик ўта ўнг фаоллар биткоинда қарийб 522 минг доллар миқдорида йирик хайрияни қўлга киритганини маълум қилганди.

Ўтказма 2020 йил 8 декабрь куни 22 та электрон ҳамёнга амалга оширилган, уларнинг кўпчилиги ўта ўнг фаолларга тегишлидир. Хусусан, Groypers ўта ўнг гуруҳи етакчиси Ник Фуэнтес 250 минг долларга эга бўлган. У 6 январь куни амалдаги президент Дональд Трампни қўллаб-қувватлаб ўтказилган митингда қатнашган, кейин эса ҳужум бошланган вақтда Конгресс биносида ҳам бўлган.

Chainanalysis хабарига кўра, исми ошкор этилмаган франциялик дастурчи амалга оширган. Шундан кейин Франциянинг 20 minutes нашри 35 ёшли франциялик IТ мутахассиси маблағни ўз жонига қасд қилишдан олдин ўтказганини аниқлади.

Ахлоқ нуқтаи назаридан нашр хайриячининг исм-шарифини ошкор қилмаяпти. Аммо у французнинг ўлимидан кейин унинг блогида автоматик тарзда эълон қилинган ўлимидан олдин ёзилган хатини келтириб ўтди. Унда айтилишича, дастурчи сўнгги саккиз йилдан буён саломатлиги билан боғлиқ муаммолардан азоб чеккан, охирги пайтларда эса оғир депрессияга учраган. Шу муносабат билан у ҳаётни тарк этишга, «арзимас бойлигини эса муайян мақсадларга ва муайян одамларга мерос қолдиришга» қарор қилган.

6 январь куни Трампни қўллаб-қувватлаб ўтказилган митингдан кейин унинг иштирокчилари Капитолий ҳудудига бостириб кирди ва Жо Байденни сайланган давлат раҳбари этиб тасдиқлаш ҳақидаги Конгресс мажлиси бўлиб ўтаётган бино ичкарисига кириб олди. Шиддатли ҳужум оқибатида беш киши ҳалок бўлди, улар орасида бир полициячи бор. Намойишчилар қувиб юборилганидан кейин АҚШ ҳукумати ички терроризм ҳақида ўнлаб жиноят ишларини қўзғатди ва 100 дан ортиқ тартибсизлик иштирокчиларини қўлга олди.

Байден Капитолийга ҳужум ва Вашингтондаги тартибсизликлар сиёсий экстремистлар томонидан режалаштирилганини, уларни эса Трамп гижгижлаганини айтди. Шу муносабат билан Конгресснинг Вакиллар палатаси амалдаги президентга импичмент эълон қилди.