“Manchester Yunayted” va “Everton” klublari sobiq hujumchisi Ueyn Runi futbolchilik faoliyatini yakunladi.
Runi “Derbi Kaunti”ning bosh murabbiyiga aylandi. 35 yoshli mutaxassis bilan 2023-yilning yoziga qadar mo‘ljallangan shartnoma imzolangan. Ueyn bu jamoada o‘ynovchi murabbiy sifatida ishlab kelayotgandi. Noyabr oyida esa Runi bosh murabbiy vazifasini bajaruvchi etib tayinlangandi.
“Butun umr futbol o‘ynadim, hali ham uning bir bo‘lagi ekanim katta omad. Bu men uchun yangi bob. Albatta, maydondagi o‘yinni sog‘inaman. Biroq to‘xtash vaqti keldi. Mening davrim o‘tdi, navbat yosh avlodga, men esa ularni boshqaradigan vaqt keldi”, — deydi Runi.
Runi faoliyati davomida “Everton”, “Manchester Yunayted”, “Di Si Yunayted” va “Derbi” klublarida to‘p surgan.
Runi “Manchester Yunayted” safidagi 559 o‘yinda 253 ta gol urgan, besh marta Angliya chempionligi va bir marta Chempionlar Ligasi bosh sovriniga ega chiqqan. Angliya terma jamoasida 120 ta o‘yin o‘tkazib, 53 ta gol urgan.
“Derbi” Chempionshipda 19 ochko to‘plagan holda 22-o‘rinda bormoqda. Runi bosh murabbiy sifatidagi ilk o‘yinini “Roterhem”ga qarshi o‘tkazadi.
Ueyn Runining “Manchester Yunayted” safida Premyer Ligadagi top-10 goli (video)
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)