AQSHning Florida shtatidagi 3 ta qamoqxonada mahbuslar o‘ta og‘ir sharoitlarga tushib qolgan, xususan, ularga tibbiy yordam ko‘rsatilmayapti. Buning oqibatida lagerda 2 nafar mahbus vafot etgan. Bu haqda Al Jazeera xabar berdi.
Human Rights Watch tashkiloti 21-iyul kuni immigratsiya qamoqxonalari borasida hisobot e’lon qildi. Tahliliy hisobot tashkilotning inqiroz va mojarolar bo‘yicha direktori Belkis Uill tomonidan yozilgan. Unda “muhojirlarga g‘ayriinsoniy ravishda munosabatda bo‘linayotgani” aytilgan.
“Bular oddiy hodisalar emas. Qamoqxonalar jiddiy suiiste’molliklar bilan to‘lib-toshib, tizim tubdan buzilgan”, dedi Uill.
Ta’kidlanishicha, Florida shtatidagi 3 ta muassasada, jumladan, Krome, Brouard va federal qamoqxonalarida mahbuslarning tibbiy ehtiyojlari qondirilmayapti. E’lon qilingan hisobotdagi barcha ma’lumotlar hozirgi va sobiq mahbuslarning ko‘rsatmalari, ularning oila a’zolari, advokatlar, Immigratsiya va bojxona nazorati ma’lumotlariga asoslangan. Xususan, 3 ta muassasada tibbiy yordamga nisbatan mas’uliyatsiz yondashuv, jumladan, davolanish va dori-darmonlardan foydalanishga ruxsat berilmagani aytilgan.
Aprel oyi oxirida hibsdagilardan birining sog‘lig‘i yomonlashgani sabab mahbuslar qo‘riqchilardan yordam so‘ragan. Gaitilik 44 yoshli Mari Anj Blez og‘riq azobidan qichqirishni boshlagan. Ammo unga “shunchaki e’tibor berilmagan”.
“Biz yordam so‘rab baqira boshladik, ammo qo‘riqchilar bizni e’tiborsiz qoldirdi. Yarim soatdan ko‘proq vaqt o‘tgach, qutqaruv guruhi keldi. Ammo Mari yerda qimirlamasdan yotardi”, degan voqeaga guvohlardan biri.
Ukrainalik 44 yoshli mahbus Maksim Chernyakning rafiqasi ham qamoqdagi voqealardan birini so‘zlab berdi. Uning aytishicha, Maksim shifokor so‘rab, bir necha marta xodimlarga murojaat qilgan bo‘lsa-da, unga javob berishmagan. Erkak isitma, yurak sohasidagi og‘riq va boshqa simptomlarni boshidan kechirgan. Keyinchalik esa u qayt qila boshlagan.
Shundan so‘ng qo‘riqchilar erkakni ko‘rib, uni noqonuniy sintetik giyohvand moddalarni iste’mol qilishda ayblagan. Chernyakning kameradoshi esa bu da’volarni rad etgan. Erkak olib ketilib, ko‘rikdan o‘tkazilganda uning miyasi allaqachon ishlashdan to‘xtagani ayon bo‘lgan. Oradan 2 kun o‘tgach, Chernyakning o‘lgani ma’lum qilingan.
Bu muammolardan tashqari, qamoqxonalar mahbuslar bilan to‘lib ketgani ham aytilmoqda. Ularning ba’zilarida sig‘imdan ikki baravar ko‘p mahbuslar saqlanmoqda. Shu sabab muassasalarda ko‘rpa-to‘shak, sovun va boshqa sanitariya vositalari yetishmovchiligi yuzaga kelgan. Ayrim mahbuslar polda uxlashga majbur bo‘lmoqda.
Shuningdek, Krome qamoqxonasi faqat erkaklar uchun mo‘ljallangan muassasa bo‘lishiga qaramay, bu yerga ayollar ham olib kelinib, joylashtirilgan. Ular erkaklarga ko‘rinib turadigan ochiq hojatxonalardan foydalanishga majbur qilingan. Bundan tashqari, ayollarga dush qabul qilish imkoni ham berilmagan.
“Agar erkaklar stulga chiqsa, bizning xonamiz va hojatxonamizni ko‘ra olardi. Xodimlardan dush qabul qilishga ruxsat so‘radik. Lekin ular muassasa faqat erkaklar uchun mo‘ljallanganini aytib, bizga ruxsat bermadi”, degan argentinalik ayol.
Bu holatlardan tashqari, kuch ishlatish, kam oziq-ovqat, uzoq vaqt kishanlanish va haddan tashqari issiq va sovuq sharoit muammolari ham hisobotda sanab o‘tilgan. Jumladan, 6 kishiga mo‘ljallangan xonada 30 dan 40 nafargacha odam saqlanganini aytilgan. Ular hojatxona sifatida chelakdan foydalangan.
Izoh (0)