So‘nggi yillarda kino sanoatida eski filmlarning qayta talqin qilinishi asosiy yo‘nalishlardan biriga aylangan. “Qattiqqo‘l xonim 2” buning eng shov-shuvli misollaridan biri bo‘lib, muxlislar orasida katta qiziqish uyg‘otmoqda. Quyida sevimli filmlarni eslatib yuboradigan remeyklar, qayta ishga tushirilgan loyihalar va franshizalar davomi haqidagi ma’lumotlarni taqdim etamiz.
“Qattiqqo‘l xonim 2”
Disney kompaniyasi tomonidan suratga olinayotgan filmda qat’iy va talabchan rahbar, bosh muharrir Miranda Pristli rolini o‘ynagan aktrisa Meril Strip va moda jurnali xodimi obrazini gavdalantirgan Emili Blant o‘z rollariga qaytadi.
Taxminlarga ko‘ra, filmning keyingi qismida Podium jurnali muvaffaqiyatsiz kunlarni boshidan kechirishi haqida hikoya qilinadi. Uning bosh muharriri Miranda Pristli yirik lyuks brend bilan reklama shartnomasini imzolashni rejalashtiradi. Buning uchun u o‘zining sobiq yordamchisi, hozirda o‘sha brendda yetakchi lavozimni egallab turgan Emilidan yordam so‘raydi.
Aktrisa Enn Hetuey o‘z roliga qaytish masalasi hozircha ochiq qolmoqda, biroq joriy yilning boshida u “Qattiqqo‘l xonim” filmining davomi suratga olinishi dargumon, degan fikrni bildirgandi. Filmning davomi bo‘yicha muzokaralar uning rejissyori Devid Frenkel tomonidan olib borilmoqda, ssenariy muallifi — Alin Brosh Makkenna. Kartinaning premyerasi 2026-yil 1-mayga mo‘ljallangan.
“Garri Potter”
So‘nggi yillardagi eng shov-shuvli restart — HBO tomonidan tayyorlanayotgan “Garri Potter” serialidir. Bu loyiha ilk bor 2023-yilda e’lon qilingan va hozirda aktyorlar tarkibi ustida ish olib borilmoqda. Yangi serial mashhur sehrgar haqidagi filmlar syujeti asosida quriladi. Suratga olish ishlari bilan “Taxtlar o‘yini” serialini taqdim etgan HBO kompaniyasi shug‘ullanadi. Shou yettita kitob asosida suratga olinib, yetti mavsumdan iborat bo‘ladi.
“Fantastik to‘rtlik: ilk qadamlar”
Bu superqahramonlar jamoasi 2005- va 2015-yillarda ikki marta qayta ekranlashtirilgan. Birinchi versiyada Yong‘in odam rolida Kris Evans bo‘lgan, ikkinchisida esa janob Fantastik obrazini Maylz Teller ijro etgan. 2025-yil 23-iyulda Marvel tomonidan taqdim etiladigan navbatdagi remeykda bosh rollarni Pedro Paskal, Vanessa Kirbi, Jozef Kvinn va Ebon Moss-Baxrax ijro etadi.
“Supermen”
2025-yil 11-iyul kuni katta ekranlarda namoyish etilgan “Supermen” filmi DC Studios tomonidan taqdim etildi. Unda Supermen endigina o‘z missiyasini anglayotgan yosh qahramon sifatida tasvirlandi. Bu galgi hikoya odatdagidek Kryptondan Yerga kelish bilan boshlanmaydi, balki qahramonning allaqachon insonlar orasida yashab, o‘z o‘rnini izlayotgan pallasi ko‘rsatiladi.
Film tanqidchilar va tomoshabinlar tomonidan iliq kutib olindi. U 400 million dollardan ortiq daromad keltirdi va DC olamining yangi bosqichiga ishonchli kirish sifatida baholandi. Ayniqsa, bosh qahramon obrazining yangi avlodga mos talqini ko‘pchilikni o‘ziga tortdi.
Yana bir qiziqarli jihat, “Supermen” namoyishidan so‘ng tomoshabinlar orasida bosh qahramonning iti Kriptoga bo‘lgan qiziqish ortib, itlarni boqib olish bo‘yicha murojaatlar soni keskin oshdi.
“Qarg‘a”
2024-yilda chiqqan “Qarg‘a” filmi tanqidchilar e’tiboridan chetda qolmadi. Ular bu filmni 1994-yilgi kult ekran adaptatsiyasi va unda bosh rolni ijro etib, suratga olish vaqtida vafot etgan aktyor Brendon Lining xotirasiga hurmatsizlik deb hisoblashdi. Shunga qaramay, film namoyish etildi. Unda bosh rolni Bill Skarsgard o‘ynadi.
“Qarg‘a” filmi Jan O’Barrning grafik romaniga asoslangan, 1994-yildagi afsonaviy adaptatsiyaning zamonaviy talqini bo‘lib, Ruport Sanders rejissyorligi ostida suratga olingan yangi versiyadir. Unda aktyor Bill Skarsgard bosh rolni ijro etdi — u qasos olish uchun tirilgan musiqachi Erik Dreven rolida namoyon bo‘ldi.
“Vonka”
Barchaga ma’lum: Villi Vonka dunyodagi eng mazali shokoladni ishlab chiqaradi. Ammo u qanday qilib o‘z fabrikasini ochishga erishdi? Bu haqda 2024-yilda chiqqan “Vonka” filmi hikoya qiladi. Bu safar bosh rolni Timoti Shalame ijro etdi.
“Vonka” filmi mashhur shokolad fabrikasi asoschisi Villi Vonkaning yoshlik yillarini hikoya qiladi. Kartina avvalgi hikoyaning davomi emas, balki undan oldingi voqealarni, ya’ni Vonka qanday qilib orzusidagi shokolad fabrikasini ochishga qaror qilgani haqida hikoya qiladi.
Bosh rolni taniqli aktyor Timoti Shalame ijro etgan. U yosh va orzuga to‘la Villi Vonka obrazini samimiy va ishonarli ko‘rsatgan. Filmda g‘aroyib qahramon Umpa-Lumpa obrazini mashhur britaniyalik aktyor Hyu Grant ijro etgan.
Izoh (0)