Osiyo futbol konfederatsiyasi 15-yanvar, juma kuni 2021-yilgi musobaqalarni o‘tkazishga doir bir qator qarorlarni e’lon qildi.
Unga ko‘ra, 2021-yilning bahorida O‘zbekiston mezbonligida o‘tishi rejalashtirilgan yoshlar o‘rtasidagi U-19 Osiyo chempionati koronavirus sabab bekor qilindi. Shu bilan bir qatorda OFK ushbu yosh toifasida 2023-yilda bo‘lib o‘tadigan Osiyo chempionati mezbonligini O‘zbekistonga berdi.
Avvalroq FIFA 2021-yilda Indoneziyada bo‘lib o‘tishi rejalashtirilgan U-20 Jahon chempionatini bekor qilgandi. O‘zbekistondagi musobaqa mazkur yoshlar o‘rtasidagi Osiyo chempionini aniqlash bilan birga, Jahon chempionati yo‘llanmasi uchun ham kechishi reja qilingandi.
Bahraynda bo‘lib o‘tishi kerak bo‘lgan U-16 Osiyo chempionati ham, shuningdek, futzal va sohil futboli bo‘yicha mintaqa chempionatlari bekor qilingan.
Eslatib o‘tamiz, futbol bo‘yicha yoshlar o‘rtasidagi Osiyo chempionati mezbonligi O‘zbekistonga topshirilgandi. Musobaqa avvaliga 2020-yilning oktabr oyida o‘tishi belgilangan, biroq koronavirus sabab 2021-yilning mart oyiga qoldirilgandi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)