Florida universiteti olimlari immunitet tizimini kuchaytirib, saratonga qarshi kurashishga yordam beradigan eksperimental mRNK vaksinasini ishlab chiqdi. Bu haqda New Atlas nashri xabar berdi.
Yangi vaksina kimyoterapiya, jarrohlik aralashuvi va nur terapiyasi kabi og‘ir muolajalarga ehtiyojni kamaytirishi mumkin. Olimlar koronavirus vaksinasining vazifasiga o‘xshash “universal” preparat yaratgan. U immun hujayralarga buyruq berib, saraton o‘simtalariga birgalikda hujum qilishni faollashtiradi.
Biz saratonni davolash uchun emas, balki immunitetni kuchaytirish maqsadida ishlab chiqilgan vaksinadan foydalanib, saratonga qarshi kuchli reaksiyani yuzaga keltira olishimizni aniqladik. Shu tariqa, vaksina onkologik bemorlar orasida keng qo‘llanishi uchun sezilarli salohiyatga ega, ehtimol, hatto saratonga qarshi tayyor vaksina yaratish uchun ham, deydi tadqiqot hammuallifi Dueyn Mitchell.
Vaksina laboratoriya sharoitida sichqonlar ustida sinovdan o‘tkazilgan. Natijada vaksina keng tarqalgan immunoterapevtik dori — PD-1 ingibitori bilan birgalikda qo‘llanganda, u melanoma bilan og‘rigan sichqonlarda dorilarga chidamli o‘simtalarni yo‘q qilgan. Miya saratoni, suyak saratoni va teri saratonining boshqa turlari bo‘yicha esa vaksina hatto qo‘shimcha dori vositalarisiz ham o‘z samaradorligini ko‘rsatgan.
Hozirda ushbu vaksina klinik oldi sinov bosqichida bo‘lib, olimlar insonlar ustida klinik sinovlarni boshlashga tayyorgarlik ko‘rmoqda.
Izoh (0)