Telegram ijtimoiy tarmog‘ida “Dahshat. Namanganda tadbirkorning qo‘lini qayirib, ketidan tepib mashinaga solishdi” nomli video va foto maqola tarqaldi. Holat yuzasidan Tergov departamenti rasmiy ma’lumot berdi.
Ma’lum qilinishicha, 2020-yilning 17-dekabr kuni soat 13:00 da 48 yoshli T.I. Namangan shahar “Sohil” MFY hududida joylashgan qurilish obyektida ishchi sifatida ishlayotgan vaqtida Namangan viloyati hokimligi ishchi guruhi tarkibida noqonuniy qurib olingan binolarni buzish jarayonida ishtirok etayotgan 28 yoshli H.U. bilan og‘zaki tortishib, uni shaharsozlik norma talablariga zid ravishda noqonuniy qurilayotgan binoni buzish haqidagi talabiga bo‘ysunmasdan, uyatli so‘zlar bilan haqorat qilib, jamiyatda yurish-turish qoidalarini qasddan mensimagan.
Shundan so‘ng T.I. H.U.ning qo‘li bilan yuziga urib, tan jarohati yetkazgani aniqlangan.
Sud-tibbiy ekspertiza xulosasida, fuqaro H.U.ning badanida aniqlangan jarohatlari o‘rtacha og‘ir tan jarohatlari ekanligi ko‘rsatilgan.
Mazkur holat yuzasidan 2020-yilning 29-dekabr kuni Namangan shahri bo‘yicha IIO FMB 1-sonli IIB Tergov bo‘linmasi tomonidan Jinoyat kodeksining 277-moddasi 2-qismi “a” bandi (bezorilik) bilan jinoyat ishi qo‘zg‘atilgan.
Mazkur jinoyat ishi bo‘yicha olib boriladigan surishtiruv harakatlari davomida janjalda ishtirok etgan barcha shaxslarning harakatlariga huquqiy baho berilishi ta’minlanadi. Hozirda jinoyat ishi bo‘yicha surishtiruv harakatlari olib borilmoqda.
Shuningdek, Ichki ishlar organlari to‘g‘risidagi qonunning 22-moddasida ko‘ra, ichki ishlar organlari xodimlari tomonidan qanday hollarda jismoniy kuch ishlatilishiga ruxsat berilganligi belgilab qo‘yilgan.
Agar kuch ishlatilmaydigan usullar ichki ishlar organi xodimining zimmasiga yuklatilgan majburiyatlarning bajarilishini ta’minlamasa, u quyidagi hollarda shaxsan o‘zi yoki bo‘linma (guruh) tarkibida jismoniy kuch ishlatish, shu jumladan, kurashning jang usullarini qo‘llash huquqiga ega bo‘ladi:
- jinoyatlarga va ma’muriy huquqbuzarliklarga chek qo‘yish uchun;
- jinoyatlar yoki ma’muriy huquqbuzarliklar sodir etgan shaxslarni eng yaqindagi ichki ishlar organiga yoxud huquqni muhofaza qiluvchi boshqa organga olib borish va bu shaxslarni ushlab turish uchun;
- ichki ishlar organi xodimining qonuniy talablariga qarshilik ko‘rsatilishini bartaraf etish uchun.
Departament bergan xabarda ta’kidlanishicha, yuqoridagi video maqolada “tadbirkorning qo‘lini qayirib” degan jumla noto‘g‘ri talqin qilingan bo‘lib, IIB xodimlari jismoniy kuch ishlatib, kurash usullarini qo‘llagan fuqaro, ya’ni T.I. tadbirkor emasligi, balki qurilishda ishlayotgan ishchi ekanligi aniqlangan.
Avvalroq Toshkent metropoliteni stansiya platformalarida tig‘iz vaqtda odamlar to‘planib qolayotgani to‘g‘risidagi xabarlarga izoh berilgan hamda Yunusobodda IIB xodimlari va fuqarolar o‘rtasidagi kelishmovchilik yuzasidan xabar berilgandi.
Izoh (0)