Taniqli shoira Gulchehra Nurullayeva 2021-yilning 15-yanvar kuni 83 yoshida olamdan o‘tdi, deya xabar bermoqda O‘zbekiston yozuvchilar uyushmasi.
Gulchehra Nurullayeva 1938-yilda Toshkent viloyatining Choshtepa qishlog‘ida tug‘ilgan. 1956—1964-yillarda Toshkent universitetining jurnalistika bo‘limida tahsil olgan.
U 1961—1967-yillarda “O‘zbekiston xotin-qizlari” jurnalida ishlagan. 1967—1969-yillarda esa Moskvadagi ikki yillik oliy adabiyot kursida o‘qigan.
Oliy adabiyot kursini tugatgach, G‘afur G‘ulom nomidagi adabiyot va san’at nashriyotida muharrir (1969—1970), Osiyo va Afrika mamlakatlari tarjima asarlari tahririyati muharriri (1970—1971), “Saodat” jurnalida mas’ul kotib (1976—1976), O‘zbekiston Yozuvchilar uyushmasida adabiy maslahatchi (1981—1983, 1985—1986), “Yulduzcha” nashriyotida direktor (1986—1987), O‘zbekiston Yozuvchilar uyushmasi kotibi (1991—1993) vazifalarida ishlagan.
Nurullayevaning birinchi she’riy to‘plami 1965-yilda “Quyosh tabassumi” nomi bilan chop etilgan. Shoiraning turli yillarda “Orzularim qoqadi qanot”, “Tashnaman”, “Ikkinchi bahor”, “Lirika”, “Bag‘ishlov”, “Paxta hidi”, “Nurli nuqtalar”, “Muhabbatning suvrati” nomli kitoblari ham chop etilgan.
Saida Zunnunova shoira haqida quyidagicha fikr bildirgan edi: “Men uning she’rlarini hamma vaqt o‘qib, kuzatib boraman. Shoira hissiyotidagi nafislik, teranlik, ayol qalbiga xos mayinlik hamma vaqt meni xursand qiladi. Gulchehra she’rlari ustida qunt bilan ishlaydi. Bu uning satrlarining pishiqligidan, yangi, chiroyli obrazlar topa bilishidan ko‘rinib turadi”.
Shoira o‘zining tanqidiy fikrlari uchun 1990-yillarda ma’lum muddat ta’qibga uchragan, Yozuvchilar uyushmasi a’zoligidan chetlatilgan. 2018-yilning noyabr oyida esa u O‘zbekiston Yozuvchilar uyushmasi a’zoligiga qayta qabul qilingan.
Shuningdek, 2019-yilning 9-may kuni O‘zbekiston faxriylarni ijtimoiy qo‘llab-quvvatlash “Nuroniy” jamg‘armasi tomonidan I darajali “Mehnat faxriysi” ko‘krak nishoni (oltin medali) bilan taqdirlangan.
Gulchehra Nurullayeva 16-yanvar kuni Toshkentdagi Do‘mbirobod qabristoniga dafn etildi.
Avvalroq Akademik To‘lqin Bekmurodov 85 yoshida, O‘zbekiston xalq shoiri To‘lan Nizom hamda jurnalist va yozuvchi Sotvoldi Rajabov vafot etgani haqida xabar berilgandi.
Izoh (0)