Prezident Shavkat Mirziyoyev 15-yanvar, juma kuni Yunusobod tumani faollari bilan uchrashuvda gender tenglik masalasida so‘z yuritdi, deya xabar bermoqda “Daryo” muxbiri Mirolim Isajonov.
“Oxirgi yillarda gender tenglik masalasiga katta ahamiyat qaratyapmiz. O‘tgan yili Isroil davlatiga ayol elchini tayinladik. Bu O‘zbekiston diplomatiyasida birinchi marta kuzatildi. Mana Senatimiz raisi, bosh prokuror va Oliy sudning birinchi o‘rinbosarlari ham ayollar. Qaysi soha bo‘lishidan qat’i nazar, ayollar ham faol va yetakchi bo‘lishini istayman. Bilasizlarmi, ayol bor joyda baribir adolat, haqiqat va mehr-muhabbat yonma-yon yuradi, uzoqlashmaydi.
Men Hamid Olimjon va Zulfiyaxonim asarlari, ularning hayoti to‘g‘risidagi kitoblarni juda ko‘p o‘qiyman. Barchamiz yaxshi bilamiz, Zulfiyaxonim oilasi, umr yo‘ldoshiga sadoqatli bo‘lgan. Ularning timsolida o‘zbek ayollarini ko‘raman. Zulfiyaxonim umrining so‘nggi kunlarida ham Vatanga nisbatan mehri, oilaga bo‘lgan muhabbati, farzandiga bo‘lgan tarbiyasi bilan yashadi. Ulardek bilimli, o‘qimishli qizlarimiz safi qancha kengaysa, oilaviy ajrimlar soni shuncha kamayadi. Shuning uchun ham xotin-qizlarning ta’lim olishiga katta e’tibor beryapmiz”, — dedi Prezident.
Mavzuga doir:
- Shavkat Mirziyoyev Yunusobod tumani mahalla raislari va yoshlar bilan muloqot qildi
- “Mahalla raisi – Prezidentning quyi bo‘g‘indagi ustuni”. Shavkat Mirziyoyev Yunusoboddagi mahalla faollari bilan uchrashdi
- “Sizga Amerika elchixonasida ishlab kelish imkoniyatini beraman” — Shavkat Mirziyoyev 17 yoshli talaba qizning taklifini qo‘llab-quvvatladi
Izoh (0)