“O‘zbekkino” tashabbusi bilan joriy hafta boshidan boshlangan milliy kino haftaligining beshinchi kuni ham har doimgidek unutilmas lahzalarga boy o‘tmoqda. 11-yanvardan buyon Yoshlar ijod saroyida kino muhiti o‘rab oldi. Unda shou konsert dasturlari, qishgi mavsum premyeralari, yangi kinoloyihalar, pitching va ijodiy uchrashuvlarga bag‘ishlandi.
Haftalikning ushbu kuni kino sohasiga yangi qadamlar bilan kirib kelayotgan debyutant yoshlarga ataldi. Dasturga binoan “Yoshlar ijodiy-tajriba studiyasi” DUK tomonidan suratga olingan bir-biridan qiziqarli qisqa metrajli filmlar premyeralari taqdim etildi.
Mazkur filmlar orqali yoshlarning o‘ziga xos dunyoqarashi, beg‘ubor olami ijodkorlik tuyg‘ulari turfa ranglarda namoyon bo‘ladi. Jumladan, “Sartarosh”, “Niyat”, “Chana”, “Astma” va shu kabi turli mavzu va janrlardagi kinokartinalar yoshlar tomonidan iliq kutib olindi.
Filmlar namoyishidan keyin saroyning kirish zalida o‘zbek estrada yulduzlari va shou-biznes vakillari ishtirokida konsert dasturi bo‘lib o‘tdi. Sho‘x kuy-qo‘shiqlardan iborat konsert mehmonlarga pozitiv kayfiyat bag‘ishladi.
Kino haftalikka taklif etilgan taniqlilar saroy ostonasiga to‘shalgan maxsus “Qizil yo‘lak” dan o‘tishdi. Ularning tashrifi haftalik mehmonlari uchun ham kutilmagan sovg‘a bo‘ldi.
Kechki dasturda “Debyut” festivalining eng yaxshi ijodkorlarini taqdirlash marosimi bo‘lib o‘tadi.
Eslatib o‘tamiz, joriy kungacha kino haftalikda “Men terrorchi emasman”, “Sumbul”, “Millioner Jonibek” filmlarining ilk premyeralari, yangi kinoloyihalariga bag‘ishlangan pitchinglar, kastinglar, tajribali kinoijodkorlar bilan mahorat darslari, ijodiy uchrashuvlar, davra suhbatlari va albatta fotosessiyalar bo‘lib o‘tdi.
Kino haftalikning so‘nggi kunida O‘zbekiston xalq artisti, atoqli rejissor va pedagog Shuhrat Abbosovning 90 yillik yubileyiga atalgan xotira kechasi o‘tkazilishi rejalashtirilgan.
Reklama huquqi asosida.
Izoh (0)