«Ўзбеккино» ташаббуси билан жорий ҳафта бошидан бошланган миллий кино ҳафталигининг бешинчи куни ҳам ҳар доимгидек унутилмас лаҳзаларга бой ўтмоқда. 11 январдан буён Ёшлар ижод саройида кино муҳити ўраб олди. Унда шоу концерт дастурлари, қишги мавсум премьералари, янги кинолойиҳалар, питчинг ва ижодий учрашувларга бағишланди.
Ҳафталикнинг ушбу куни кино соҳасига янги қадамлар билан кириб келаётган дебютант ёшларга аталди. Дастурга биноан «Ёшлар ижодий-тажриба студияси» ДУК томонидан суратга олинган бир-биридан қизиқарли қисқа метражли фильмлар премьералари тақдим этилди.
Мазкур фильмлар орқали ёшларнинг ўзига хос дунёқараши, беғубор олами ижодкорлик туйғулари турфа рангларда намоён бўлади. Жумладан, «Сартарош», «Ният», «Чана», «Астма» ва шу каби турли мавзу ва жанрлардаги кинокартиналар ёшлар томонидан илиқ кутиб олинди.
Фильмлар намойишидан кейин саройнинг кириш залида ўзбек эстрада юлдузлари ва шоу-бизнес вакиллари иштирокида концерт дастури бўлиб ўтди. Шўх куй-қўшиқлардан иборат концерт меҳмонларга позитив кайфият бағишлади.
Кино ҳафталикка таклиф этилган таниқлилар сарой остонасига тўшалган махсус «Қизил йўлак» дан ўтишди. Уларнинг ташрифи ҳафталик меҳмонлари учун ҳам кутилмаган совға бўлди.
Кечки дастурда «Дебют» фестивалининг энг яхши ижодкорларини тақдирлаш маросими бўлиб ўтади.
Эслатиб ўтамиз, жорий кунгача кино ҳафталикда «Мен террорчи эмасман», «Сумбул», «Миллионер Жонибек» фильмларининг илк премьералари, янги кинолойиҳаларига бағишланган питчинглар, кастинглар, тажрибали киноижодкорлар билан маҳорат дарслари, ижодий учрашувлар, давра суҳбатлари ва албатта фотосессиялар бўлиб ўтди.
Кино ҳафталикнинг сўнгги кунида Ўзбекистон халқ артисти, атоқли режиссёр ва педагог Шуҳрат Аббосовнинг 90 йиллик юбилейига аталган хотира кечаси ўтказилиши режалаштирилган.
Реклама ҳуқуқи асосида.
Изоҳ (0)