Tojikiston hamda O‘zbekiston o‘rtasida doimiy aviaqatnovlar qayta tiklandi. Bu haqda 15-yanvar kuni Tojikiston hukumati huzuridagi Fuqaro aviatsiyasi agentligi direktori Ikrom Subxonzodaga tayanib, “Xovar” nashri ma’lum qildi.
Subxonzodaning qayd etishicha, Respublika maxsus shtabining qaroriga binoan ikki mamlakat poytaxtlari o‘rtasida parvozlar haftada ikki marta O‘zbekiston havo yo‘llari hamda Tojikistonning Somon Air aviakompaniyasi tomonidan amalga oshiriladi.
Qarorga muvofiq, O‘zbekiston havo yo‘llari haftaning chorshanba kunlari, Somon Air esa juma kunlari parvozlarni amalga oshiradi. Yo‘lovchilar chiptalarni savdo nuqtalarida sotib olishlari mumkin.
Tojikiston hukumati huzuridagi Fuqaro aviatsiyasi agentligi direktori Ikrom Subxonzodaning ta’kidlashicha, COVID-19 tarqalishining oldini olish uchun barcha yo‘lovchilar sanitariya va epidemiyaga qarshi talablarga rioya qilishlari, himoya niqoblari va qo‘lqoplarini kiyishlari kerak. Yo‘lovchilar koronavirusga chalinmaganini tasdiqlovchi PZR-testining oxirgi 72 soat ichida olingan ma’lumotnomasiga ega bo‘lishi kerak.
Avvalroq O‘zbekiston 7 davlat bilan xalqaro aviaqatnovlar bo‘yicha cheklov muddatini uzaytirgani hamda O‘zbekistonda xorijga chiqish pasporti uchun to‘lov miqdorini kamaytirish taklifi berilgani haqida xabar berilgandi.
Izoh (0)