Shavkat Mirziyoyev Yunusobod tumanidagi “Yangibog‘” mahallasiga tashrif buyurdi, deya xabar qilmoqda Prezident matbuot xizmati.
Ta’kidlanishicha, aholi turmush darajasida mahallalardagi sharoit, infratuzilma va xizmatlar sifati muhim omil. Islohotlar natijalari, sohalardagi o‘zgarishlar ham avvalo mahallada seziladi.
Shu bois, Prezident Oliy Majlisga Murojaatnomasida barcha darajadagi rahbarlar pastga tushib, o‘z sohasi bo‘yicha ishni mahallalarda tashkil etishi, muammolarni o‘rganib, ularga yechim topishi zarurligini ta’kidlagan edi. Shu bilan birga, mahalla idorasining vakolatini kengaytirish, rais va xodimlarning moddiy ta’minotini yaxshilash bo‘yicha tashabbuslar ilgari surilgan edi.
Davlat rahbari shunday ishlar bilan tanishish maqsadida Yunusobod tumanidagi “Yangibog‘” mahalla fuqarolar yig‘inida bo‘ldi.
Qayd etilishicha, bu yerda 7 ming nafarga yaqin aholi istiqomat qiladi. 2 mingdan ziyod oila mavjud. Yangi qurilgan mahalla guzari binosida keng sharoitlar yaratilgan.
Shu yerda Yunusobod tumanidagi mahallalar faollari bilan muloqot bo‘ldi.
“Mahalla raisi – Prezidentning quyi bo‘g‘indagi ustuni. Mahallaning iqtisodiyotini o‘zgartirsak, jamiyatimiz o‘zgaradi. Buning uchun yoshlarning tashabbuslarini qo‘llab-quvvatlash, ‘Har bir oila – tadbirkor’ dasturidan samarali foydalanish kerak”, – dedi Shavkat Mirziyoyev.
Ko‘p qavatli uylarga sifatli xizmat ko‘rsatuvchi boshqaruv kompaniyalari tashkil etish, ichki yo‘llarni ta’mirlash, maishiy xizmatlarni ko‘paytirish bo‘yicha ko‘rsatmalar berildi.
Avvalroq Shavkat Mirziyoyev Senatning yangi binosi qurilishini ko‘zdan kechirgani, Toshkentda ochilgan yangi zargarlik korxonasini borib ko‘rgani hamda Respublika ixtisoslashtirilgan nefrologiya va buyrak transplantatsiyasi ilmiy-amaliy tibbiyot markaziga tashrif buyurgani haqida xabar berilgandi.
Izoh (0)