Rossiya 2020-yili Yevrosiyo iqtisodiy ittifoqida kuzatuvchi maqomini olgan O‘zbekiston yaqin istiqbolda ittifoqning to‘laqonli a’zosi bo‘lishiga umid bog‘lagan. Bu haqda Rossiya bosh vaziri o‘rinbosari Aleksey Overchuk Gaydar forumida ma’lum qildi, deb xabar beradi “Interfaks”.
“Biz O‘zbekistonni ittifoq a’zosi sifatida ko‘rishga ishonamiz va barcha a’zolar bunda ko‘mak beradi. Rossiya ham bu masalada O‘zbekistonga yordam beradi”, — deydi Overchuk.
2020-yil 11-dekabr kuni bo‘lib o‘tgan Yevrosiyo iqtisodiy ittifoqining (YeOII) videoanjuman shaklidagi sammitida O‘zbekiston va Kubaga tashkilot huzuridagi kuzatuvchi davlat maqomini berish to‘g‘risida qaror qabul qilingandi.
Eslatib o‘tamiz, Prezident Shavkat Mirziyoyev 2020-yil yanvarda parlamentga yo‘llagan Murojaatnomasida ushbu masala hukumat tomonidan parlament muhokamasiga kiritilishi va xalq vakillari bilan batafsil ko‘rib chiqilishini ma’lum qilgan edi. Mart oyining boshlarida esa O‘zbekiston YeOIIga kuzatuvchi-davlat maqomida qo‘shilishi ma’lum bo‘lgandi. May oyida Oliy Majlis O‘zbekistonning YeOII faoliyatida kuzatuvchi davlat maqomida ishtirok etishi to‘g‘risidagi taklifni ma’qullagandi. Ovoz berish jarayonida 100 nafar senatordan 91 nafari ishtirok etgan. Ulardan 71 nafari qarorni ma’qullab ovoz bergan, 16 senator qarshi chiqqan, to‘rt senator betaraf qolgan.
Izoh (0)