Самарқанд вилоят болалар кўп тармоқли тиббиёт марказига сунъий буйрак муаммоларини бартараф этиш мақсадида 748 миллион 500 минг сўмга 5 та гемодиализ аппарати олиб келинди. Шунингдек, вилоят соғлиқни сақлаш бошқармаси маблағлари ҳисобидан 749 миллион сўм эвазига иккита сув нососи ҳам келтирилди. Бу ҳақда «Дарё» мухбири Фарҳод Норбўтаев хабар берди.
«Вилоятимизда ҳозирги вақтда буйракнинг сурункали касалликлари оқибатида сурункали буйрак етишмовчилиги билан 41 нафар бемор болалар назоратда туради. Бу беморлар доимий равишда диализ муолажалари ўтказилишига муҳтож ҳисобланади. Марказимизнинг болалар кардиохирургияси бўлимида йил давомида ўртача 250-350 нафар болада юракда очиқ турдаги операциялар амалга оширилади. Бу беморларнинг 10 фоизи оғир юрак туғма нуқсонлари бўлиб, операциядан кейинги даврда гемодиализ хизматига муҳтож бўлиши мумкин. Бундан ташқари, 2019 йил давомида 10 нафар, 2020 йилда эса 2 нафар беморни ўткир буйрак етишмовчилиги ташхиси билан гемодиализ ўтказиш учун Тошкент шаҳрига юборишга мажбур бўлдик», — дейди Самарқанд вилоят болалар кўп тармоқли тиббиёт маркази раҳбари Маматқул Азизов.
Самарқандда гемодиализга муҳтож бўлган бемор болаларга тиббий ёрдам кўрсатиш мақсадида ташкил этилган сунъий буйрак (гемодиализ) бўлимини очилиш маросимида соғлиқни сақлаш вазири ўринбосари Элмира Боситхонова ҳам иштирок этган.
Маълум қилинишича, ушбу бўлимда ишлаш учун кадрлар Тошкент шаҳридаги «Республика ихтисослаштирилган нефрология, гемодиализ ва буйрак трансплантацияси илмий маркази»да бирламчи ихтисослаштиришдан ўтказилган. Бўлим учун керакли барча тиббий жиҳозлар, керакли эҳтиёж қисмлар (бир марталик диализаторлар магистрали билан ва тузли эритмалар) олиб келиб жойлаштирилиб, беморларни қабул қилиш учун тайёр ҳолатга келтирилган. Шунингдек, 75 миллион сўм марказ жамғарма маблағлари ҳисобидан бўлим жорий таъмирланиб, беморларга тиббий хизмат кўрсатишга мослаштирилган.
Изоҳ (0)