Осиё футбол конфедерацияси 15 январь, жума куни 2021 йилги мусобақаларни ўтказишга доир бир қатор қарорларни эълон қилди.
Унга кўра, 2021 йилнинг баҳорида Ўзбекистон мезбонлигида ўтиши режалаштирилган ёшлар ўртасидаги U-19 Осиё чемпионати коронавирус сабаб бекор қилинди. Шу билан бир қаторда ОФК ушбу ёш тоифасида 2023 йилда бўлиб ўтадиган Осиё чемпионати мезбонлигини Ўзбекистонга берди.
Аввалроқ FIFA 2021 йилда Индонезияда бўлиб ўтиши режалаштирилган U-20 Жаҳон чемпионатини бекор қилганди. Ўзбекистондаги мусобақа мазкур ёшлар ўртасидаги Осиё чемпионини аниқлаш билан бирга, Жаҳон чемпионати йўлланмаси учун ҳам кечиши режа қилинганди.
Баҳрайнда бўлиб ўтиши керак бўлган U-16 Осиё чемпионати ҳам, шунингдек, футзал ва соҳил футболи бўйича минтақа чемпионатлари бекор қилинган.
Эслатиб ўтамиз, футбол бўйича ёшлар ўртасидаги Осиё чемпионати мезбонлиги Ўзбекистонга топширилганди. Мусобақа аввалига 2020 йилнинг октябрь ойида ўтиши белгиланган, бироқ коронавирус сабаб 2021 йилнинг март ойига қолдирилганди.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)