O‘zbekistonda o‘tadigan U-19 Osiyo chempionatining yangi sanasi ma’lum qilindi

Osiyo futbol konfederatsiyasi (OFK) O‘zbekiston mezbonligida o‘tadigan U-19 Osiyo chempionatining yangi sanasini ma’lum qildi.

OFKning musobaqalar o‘tkazish qo‘mitasi 11-noyabr kungi yig‘ilishida 2021-yilgi musobaqalarning yangilangan taqvimi e’lon qilindi, deya xabar qilmoqda O‘zbekiston futbol assotsiatsiyasi matbuot xizmati.

Unga ko‘ra, JCh—2022 va Osiyo Kubogi—2023 qo‘shma saralash bahslari bahordan boshlab davom etadi. 7-8-tur o‘yinlari mart oyida o‘tkazilsa, 9-10-turlar iyun oyida bo‘lib o‘tadi. JCh—2022 musobaqasining yakuniy saralash bosqichi 2021-yilning sentabrida boshlanadi va 2022-yilning martiga qadar davom etadi.

O‘zbekiston mezbonlik qiladigan U-19 Osiyo chempionati esa 2021-yilning 3—20-mart kunlarida bo‘lib o‘tadi. Musobaqa avval xabar berilganidek O‘zbekistonning uchta shahrida (Toshkent, Namangan va Olmaliq) bo‘lib o‘tadi.

Eslatib o‘tamiz, avvaliga 2020-yilning 14—31-okbarida bo‘lib o‘tishi belgilangan musobaqa koronavirus sabab 2021-yilga qoldirilgandi.

U-19 Osiyo chempionatida jami 16 mamlakatning yoshlar terma jamoalari ishtirok etadi. O‘zbekiston “A” guruhida Eron, Indoneziya va Kamboja bilan kuch sinashadi.

Mazkur musobaqa 2021-yili Indoneziyada bo‘lib o‘tadigan U-20 Jahon chempionatiga saralash vazifasini ham o‘taydi. Unga ko‘ra, O‘zbekistonda o‘tadigan musobaqaning yarim finalchilari Jahon chempionatiga yo‘llanma oladi.