9 январь куни Индонезияда Sriwijaya Air авиакомпаниясига тегишли Boeing 737-500 самолёти ҳалокатга учриши оқибатида 62 киши ҳалок бўлган эди. Мутахассисларнинг таъкидлашича, самолётнинг ҳалокатга учрашига унинг пандемия сабаб бир неча ой парвозсиз туриб қолгани ҳам сабаб бўлган бўлиши мумкин, деб ёзади «Коммерсантъ».
The Daily Telegraph’нинг маълум қилишича, ҳалокатга учраган Boeing 737-524’дан 2020 йилнинг 23 мартидан 19 декабрига қадар фойдаланилмаган. Экспертларнинг фикрича, бу каби узоқ муддат туриб қолиши техник муаммоларни юзага келтирган.
«Ҳозирда ушбу самолётларни эксплуатацияга қайтариш бўйича жиддий муаммолар юзага келмоқда, чунки улар 9-10 бир жойда туриб қолган, улардан фойдаланилмаса техник ҳолати ёмонлашади», — дейди авиация хавфсизлиги соҳасидаги консалтинг компания раҳбари Хю Ричи.
АҚШ Транспортда хавфсизлик бўйича миллий кенгашининг собиқ ходими Жон Голининг айтишича, узоқ вақт ерда туриб қолган самолётлар икки ҳафта давомида яхшилаб техник кўрикдан ўтиши керак.
Экспертларнинг таъкидлашича, бу қадар узоқ вақт давомида парвозларни амалга оширмаган учувчилар маълум тайёргарликдан ўтиши керак. Ҳозирча Boeing 737-524’нинг ҳалокатга учраши сабаб расман маълум қилинмаган, тергов ишлари давом этмоқда.
Изоҳ (0)