Avstraliya hukumati 13 ming kilometr masofani bosib o‘tib, AQShdan tasodifan mamlakatga yetib kelgan Jo ismli poyga kaptarini evtanaziya – infeksiya yordamida o‘ldirishga qaror qildi, deb xabar bermoqda Associated Press’ga tayanib “Interfaks”.
Ta’kidlanishicha, rasmiy ravishda qush karantin choralarini buzuvchi hisoblanadi. Kaptarning materikka qanday yetib kelgani aniq emas. Taxminlarga ko‘ra, u Tinch okeani orqali yuk kemasida suzib yoki o‘zi uchib kelgan bo‘lishi mumkin.
Kaptar sport qushi ekanligi ma’lum bo‘lgan. U 29-oktabr kuni AQShning Oregon shtatidagi poygalarda qatnashgan va g‘oyib bo‘lgan. Qushni 26-dekabr kuni Melburnda yashovchi Kevin Selli-Byord o‘z tomorqasidan topib olgan.
Kevin qushni oziqlantirib, unga suv bergan. Kuchga kirgan qush o‘sha paytdan beri unga “hayot bag‘ishlagan” Selli-Byordning tomorqasida boshqa kaptarlar bilan yashamoqda.
“Menimcha, u qolishga qaror qildi. Chunki men uni oziqlantirdim, demak, bu uning uyi”, – dedi Selli-Byord.
Selli-Byord kaptarga AQShda saylangan prezident Jo Baydenning sharafiga Jo deb nom bergan. Keyinchalik ma’lum bo‘lishicha, Oklahoma shtatidagi poyga kaptarlari ittifoqi qushning Alabama shtatidagi Montgomeri shahrida ro‘yxatdan o‘tganligini tasdiqladi. Kevinning so‘zlariga ko‘ra, u qush egasi bilan bog‘lanmoqchi bo‘lgan, ammo hali bunga erishmagan.
Ayni paytda Avstraliya karantin va inspeksiya xizmati qush kasallik tashuvchisi bo‘lishi mumkinligidan xavotirda. Hokimiyat Kevindan qushni tutishni so‘ragan. Kevin bu ishni qilolmagandan keyin karantin xizmati professional qush tutuvchilar xizmatidan foydalanishga qaror qilgan.
Avstraliya qishloq xo‘jaligi vazirligi kaptarning mamlakatda oziq-ovqat xavfsizligi va yovvoyi qushlar populyatsiyasiga tahdid solishi mumkinligini tushuntirdi.
“Kaptar Avstraliyadagi qushlar va parrandalar uchun to‘g‘ridan to‘g‘ri bioxavfni tug‘diradi”, – deyiladi vazirlik bayonotida.
Avstraliya milliy kaptarlar assotsiatsiyasi kotibi Bred Tyorner AQShdan kelgan kaptar ekzotik kasalliklarga duchor bo‘lganligidan qo‘rqishini yana bir bor ta’kidladi va Jo evtanaziya qilinishi kerakligiga rozi bo‘ldi.
Avvalroq esa Los-Anjeles hayvonot bog‘idagi bir juft qari sher ayriliqda yashamasligi uchun bir vaqtda zaharlab o‘ldirilgani hamda Van Damm hujjatlari bilan bog‘liq muammo sabab o‘ldirilishi kerak bo‘lgan chixuaxuaning hayotini saqlab qolgani haqida xabar berilgandi.
Izoh (0)