Moldova prezidenti Mayya Sandu birinchi rasmiy tashrif bilan Ukrainaga avtomobilda jo‘nab ketdi, deb yozadi “RBK” prezident matbuot xizmatiga tayanib.
Prezident matbuot kotibi Sorina Shtefirsa aniqlik kiritishicha, xarajatlarni kamaytirish maqsadida delegatsiya Kiyevga samolyotda emas, mashinada yetib olishga qaror qilgan. Uning so‘zlariga ko‘ra, bu pandemiya davrida biron joyga borishning eng samarali usulidir.
Ukraina va Moldova vakillarining rasmiy uchrashuvi 12-yanvarda bo‘lib o‘tadi. Sandu Ukraina prezidenti Vladimir Zelenskiy, bosh vazir Denis Shmigal va parlament spikeri Dmitriy Razumkov bilan uchrashuvlar o‘tkazadi.
Moldova delegatsiyasi tarkibiga prezidentdan tashqari to‘qqiz kishi kirdi. Shu jumladan, prezidentning tashqi siyosat bo‘yicha maslahatchisi Kristina Gerasimov, Moldovaning Ukrainadagi elchisi Ruslan Bolbochan, prezidentning energetika bo‘yicha maslahatchisi Serjiu Tofilat.
Bu Sanduning birinchi rasmiy xorijiy safaridir.
Moldovaning avvalgi prezidenti Igor Dodon noyabrdagi saylovlarda 57,74 foiz ovoz to‘plagan Sanduga yengildi. Sandu 24-dekabr kuni lavozimiga kirishdi.
Izoh (0)