Qashqadaryo viloyat bojxona boshqarmasi boshlig‘i Zafar Turdaliyev viloyatda pirotexnika vositalarining ko‘payishini, pirotexnika vositalarining boshqa viloyatlardan kirib kelayotgani bilan izohladi, deya xabar berdi “Daryo” muxbiri.
Ma’lum bo‘lishicha, 8-yanvar kuni Qarshi shahridagi Jurnalistlar uyida viloyat bojxona boshqarmasi boshlig‘i Zafar Turdaliyev ishtirokida matbuot anjumani tashkil etildi.
Matbuot anjumanida so‘z olgan viloyat bojxona boshqarmasi boshlig‘i Zafar Turdaliyev “Daryo” muxbirining “2020-yil yakunida viloyatda pirotexnika vositalari 2019-yil yakuniga nisbatan ancha ko‘paydi. Vaholanki, OAVda bojxona xodimlarining pirotexnika vositalariga qarshi kurashi o‘tgan yilgiga nisbatan ancha ko‘p va samarali bo‘ldi, deyapsiz. Ayting-chi, unda aholidagi pirotexnika vositalari qanday qilib ularning qo‘liga tushib qoldi?”, degan savoliga “Mazkur pirotexnika vositalari viloyatga xorijdan emas, qo‘shni viloyatlardan kirib kelgan”, degan javobni berdi.
“Viloyatda pirotexnika vositalarining kirib kelishiga qarshi kurash tadbirlari 2019-yilga nisbatan 2020-yilda ko‘p marotaba o‘tkazildi va 2020-yilda samaraliroq bo‘ldi”, — deydi viloyat bojxona boshqarmasi boshlig‘i.
Ta’kidlanishicha, 2019-yilda viloyat bojxona boshqarmasi xodimlari tomonidan 603 ming 817 dona noqonuniy olib kirilayotgan pirotexnika vositalari ushlab qolingan bo‘lsa, 2020-yilda bu ko‘rsatkich 771 ming 986 donani tashkil qilgan.
“To‘g‘ri, bojxona postlari orqali kirib kelayotgan pirotexnika vositalari yo‘q, desam xato bo‘ladi. Balki, bordir. Ammo bu viloyatga olib kirilgan pirotexnika vositalarining 1 yoki 5 foizini tashkil qiladi. Olib kirilayotgan pirotexnika vositalari aylanma yo‘llar orqali olib kirilmoqda. Viloyat miqyosidagi noqonuniy harakatlar Qashqadaryo chegarasida emas, balki boshqa viloyat chegaralari orqali kirish hollari kuzatilgan”, — deydi Zafar Turdaliyev.
Izoh (0)