O‘zbekistondagi barcha maktablarda “Shaxmat sinflari” ochiladi, 150 ta ixtisoslashtirilgan shaxmat maktabi tashkil etiladi. Bu haqda AOKAdagi brifingda bosh vazir o‘rinbosari Aziz Abduhakimov ma’lum qildi.
“Joriy yilda sport musobaqalari sonini oshirish maqsadida davlat budjetidan 100 milliard so‘m miqdorida mablag‘ ajratiladi. Hozirda sport bilan doimiy shug‘ullanish ko‘rsatkichi 19 foiz bo‘lib, 2021-yil yakunigacha bu ko‘rsatkich 25 foizga yetkaziladi.
Turli yoshdagi yoshlarni qamrab oladigan futbol bo‘yicha ‘Charm to‘p’ bosh vazir kubogi o‘tkaziladi. Kelgusi yilda 916 kilometrlik salomatlik yo‘laklari barpo etiladi.
Mahallalarda 500 ga yaqin stritbol maydoni, 355 ta badminton maydoni, qo‘shimcha ravishda 420 ta mini-futbol maydoni, 350 ta ko‘chada vorkaut maydonchasi quriladi. 70 ta jismoniy tarbiya va sport muassasasi, 16 mingga yaqin bog‘cha va 10 000 ta maktab jami 120 milliard so‘mlik birlamchi sport jihozlari bilan ta’minlanadi”, — deydi bosh vazir o‘rinbosari.
Avvalroq o‘zbekistonlik shaxmatchi Gulruhbegim Tohirjonova AQShning Missuri universiteti jamoasida dona surayotgani va endi xalqaro musobaqalarda AQSh nomidan qatnashishi ma’lum bo‘lgandi. Keyinchalik bloger Aziza Umarova shaxmatchilar oilasi va federatsiya o‘rtasidagi sovuq munosabat haqida maqola e’lon qildi. Bunga javoban federatsiya raddiya bildirdi. Federatsiya ushbu xabarlar fonida OAVda e’lon qilingan maqolalarni bir yoqlama deb baholagan. Shuningdek, terma jamoadan chiqib ketish fikri sportchining o‘ziga tegishli ekani va bunda boshqalarni aybdor qilish mumkin emasligi ta’kidlangan.
Keyinroq opa-singil shaxmatchilar Nafisa Mo‘minova va Xulkar Tohirjonova Shaxmat federatsiyasining raddiyasiga munosabat bildirib, “Shaxmat federatsiyasi ustimizdan mag‘zava ag‘dardi” degandi.
Izoh (0)