Samarqand viloyatining Pastdarg‘om tumani IIB Jinoyat qidiruv bo‘limi tezkor xodimlari tomonidan 2021-yil 6-yanvar kuni o‘tkazilgan tezkor tadbirda tumanning “Qorag‘uppa” mahallasida yashovchi 1982-yil tug‘ilgan O.F. yashash uyida pul evaziga qimor va tavakkalchilikka asoslangan boshqa o‘yinlar uchun sharoit yaratib bergani aniqlangan. Bu haqda “Daryo”ga viloyat IIB axborot xizmati xabar berdi.
Ma’lum bo‘lishicha, O.F.ning yashash uyida qimor o‘ynayotgan yetti nafar fuqarodan jami 2 million 186 ming so‘m pul va 2 dona o‘yinda ishlatilgan karta kalodalari xolislar ishtirokida hujjatlashtirib olingan.
Holat yuzasidan tuman IIB huzuridagi Tergov bo‘limi tomonidan O.F.ga nisbatan Jinoyat kodeksining 278-moddasi 1-qismi bilan (qimor va tavakkalchilikka asoslangan boshqa o‘yinlarni tashkil etish hamda o‘tkazish) jinoyat ishi qo‘zg‘atilib, tergov harakatlari olib borilmoqda.
Izoh (0)