Qashqadaryodagi mavjud 16 ta tijorat banki va ularning 60 ta filiali koronavirus pandemiyasi davrida 990 milliard so‘m kredit pullarining foizini qaytarishni olti oy muddatga kechiktirgan. Bu haqda Markaziy bankning viloyat bosh boshqarmasi boshlig‘i Fayzulla Rajabov ishtirokidagi matbuot anjumanida ma’lum qilindi, deya xabar berdi “Daryo” muxbiri.
Ma’lum bo‘lishicha, 8-yanvar kuni Qarshi shahridagi Jurnalistlar uyida Markaziy bankning viloyat boshqarmasi mas’ullari va 16 ta tijorat bankining boshqaruv raislari ishtirokida matbuot anjumani tashkil etilgan.
Matbuot anjumanida so‘z olgan Markaziy bankning viloyat bosh boshqarmasi boshlig‘i Fayzulla Rajabov viloyatdagi mavjud 16 ta tijorat banki, ularning 60 ta filiali va 27 ta mini banki tomonidan 2020-yilda amalga oshirilgan ishlar haqida ma’lumot berib, koronavirus pandemiyasi davrida bank mijozlarining qo‘llab-quvvatlangani haqida gapirgan.
“Prezidentimiz bergan topshiriqqa ko‘ra, Markaziy bank siyosati orqali 235 ming nafar mijozga berilgan salkam 1 trillion, aniqroq qilib aytadigan bo‘lsak 990 milliard so‘m kredit foizlarini to‘lash muddatini olti oyga kechiktirdik”, — deydi Fayzulla Rajabov.
Fayzulla Rajabovning qo‘shimcha qilishicha, ayni kunda viloyatda transport xizmati ko‘rsatuvchilarning kredit qarzdorliklarini bartaraf etish muddatini ham 2021-yil yakuniga qadar uzaytirish masalasi muhokama qilinmoqda.
Eslatib o‘tamiz, O‘zbekistonda 2020-yil mart oyida koronavirus pandemiyasi sabab e’lon qilingan karantin davrida jismoniy shaxslar va YaTTlarning kredit to‘lovlarini qaytarishida 1-oktabrgacha imtiyozli davr berilgani xabar qilingandi.
Izoh (0)