Қашқадарё вилоят божхона бошқармаси бошлиғи Зафар Турдалиев вилоятда пиротехника воситаларининг кўпайишини, пиротехника воситаларининг бошқа вилоятлардан кириб келаётгани билан изоҳлади, дея хабар берди «Дарё» мухбири.
Маълум бўлишича, 8 январь куни Қарши шаҳридаги Журналистлар уйида вилоят божхона бошқармаси бошлиғи Зафар Турдалиев иштирокида матбуот анжумани ташкил этилди.
Матбуот анжуманида сўз олган вилоят божхона бошқармаси бошлиғи Зафар Турдалиев «Дарё» мухбирининг «2020 йил якунида вилоятда пиротехника воситалари 2019 йил якунига нисбатан анча кўпайди. Ваҳоланки, ОАВда божхона ходимларининг пиротехника воситаларига қарши кураши ўтган йилгига нисбатан анча кўп ва самарали бўлди, деяпсиз. Айтинг-чи, унда аҳолидаги пиротехника воситалари қандай қилиб уларнинг қўлига тушиб қолди?», деган саволига «Мазкур пиротехника воситалари вилоятга хориждан эмас, қўшни вилоятлардан кириб келган», деган жавобни берди.
«Вилоятда пиротехника воситаларининг кириб келишига қарши кураш тадбирлари 2019 йилга нисбатан 2020 йилда кўп маротаба ўтказилди ва 2020 йилда самаралироқ бўлди», — дейди вилоят божхона бошқармаси бошлиғи.
Таъкидланишича, 2019 йилда вилоят божхона бошқармаси ходимлари томонидан 603 минг 817 дона ноқонуний олиб кирилаётган пиротехника воситалари ушлаб қолинган бўлса, 2020 йилда бу кўрсаткич 771 минг 986 донани ташкил қилган.
«Тўғри, божхона постлари орқали кириб келаётган пиротехника воситалари йўқ, десам хато бўлади. Балки, бордир. Аммо бу вилоятга олиб кирилган пиротехника воситаларининг 1 ёки 5 фоизини ташкил қилади. Олиб кирилаётган пиротехника воситалари айланма йўллар орқали олиб кирилмоқда. Вилоят миқёсидаги ноқонуний ҳаракатлар Қашқадарё чегарасида эмас, балки бошқа вилоят чегаралари орқали кириш ҳоллари кузатилган», — дейди Зафар Турдалиев.
Изоҳ (0)