Davlat xavfsizlik xizmati va Bosh prokuratura huzuridagi iqtisodiy jinoyatlarga qarshi kurashish departamenti xodimlari respublikaning bir nechta viloyatlarida mansabdor shaxslar tomonidan amalga oshirilgan korrupsion huquqbuzarliklar holatiga barham berdi. Bu haqda “O‘zbekiston 24” telekanali orqali ma’lum qilindi.
Toshkentda tijorat banklaridan birining boshqaruv raisi 4 milliard so‘m miqdorida kredit ajratish evaziga 15 ming dollar talab qilgan. DXX va departament tezkor xodimlari tomonidan o‘tkazilgan tezkor tadbirda mazkur bank rahbari so‘ralgan puldan 103 million so‘mini tanishiga tegishli MChJning hisob raqamiga o‘tkazish orqali qo‘lga kiritgani aniqlangan.
Shuningdek, Samarqand viloyatidagi markaziy bozor direktori hamda uning ukasi mahalliy tadbirkorga tikuvchilik sexi va do‘kon qurish uchun yer ajratishga va’da berib, buning evaziga 10 ming dollar talab qilgan. Ular ruxsatnoma uchun berilgan 5 ming dollar pulni olayotganida ushlangan.
Bundan tashqari, Qarshidagi jazoni ijro etish muassasasida xizmat qilgan IIV Qorovul qo‘shinlari noziri 5 ming dollar pora olayotganida qo‘lga tushgan. Ushbu pullar qamoqxonadagi mahbuslardan biriga mobil telefon, shuningdek, kelajakda boshqa buyumlarni yetkazib berish uchun evaziga uning tanishlari tomonidan berilgan.
Buxoro viloyatidagi tuman hokimliklaridan birining voyaga yetmaganlar bilan ishlash bo‘yicha mas’ul kotibi tuman markazidan do‘kon qurish uchun 4 sotix yer ajratishga yordam berishni va’da qilgan. U talab qilingan 4 ming dollarning yarmini oldindan olayotganida ushlangan.
Aniqlangan holatlar bo‘yicha jinoyat ishi qo‘zg‘atilgan, tergov harakatlari olib borilmoqda.
Avvalroq Urgutda fuqaroga 2 ming dollar evaziga yerga egalik huquqini olib berishni va’da qilgan kadastr xizmati xodimi ushlangani, Bo‘stonliqdagi 1 gektar yerni rasmiylashtirib berish uchun 160 ming dollar talab qilgan shaxs qo‘lga olingani, shuningdek, Toshkentda 352 ming dollarga yer sotmoqchi bo‘lgan tuman hokimligi mansabdori ushlangani to‘g‘risida xabar berilgandi.
Izoh (0)