Ukrainada qat’iy karantin amal qilishni boshladi, u 24-yanvargacha davom etadi, deb yozadi “RBK”. Jiddiy cheklov choralarini joriy qilish haqidagi qaror 2020-yil dekabri boshidayoq hukumat yig‘ilishida qabul qilingan edi.
Kafe, bar va restoranlar xo‘randalar uchun yopildi, ammo uyga olib ketish va yetkazib berish uchun ishlashda davom etmoqda. Bozorlar, fitnes zallari va ko‘ngilochar muassasalar ham ishlamayapti, ommaviy tadbirlar taqiqlangan. Karantin davrida maktablar va OTMlar yopiladi, ammo bolalar bog‘chalari ishlaydi.
Oziq-ovqat do‘konlari, banklar, dorixonalar va pochta bo‘linmalari o‘z ishini davom ettiradi. Sartaroshxonalar va go‘zallik salonlari ham mijozlarni qabul qila oladi, ammo ular qabul uchun oldindan yozilishi kerak. Jamoat transporti faoliyati cheklanmaydi.
Avvalroq Ukraina sog‘liqni saqlash vaziri Maksim Stepanov bunday choralar mavsumiy gripp va O‘RVI bilan kasallanish fonida koronavirus tarqalishini tiyib turishga urinish uchun zarurligini, ular esa yanvar oxiri — fevral boshida avj olishi kutilayotganini aytgan edi. Cheklovlar sog‘liqni saqlash tizimiga yuklamani kamaytirishi kerak, degan edi vazir.
Noyabr o‘rtalaridan Ukrainada dam olish kunlari karantin joriy qilindi. Ammo dekabrda epidemiologik vaziyat yaxshilangani tufayli bu choralar to‘xtatildi. Oy o‘rtalaridan mamlakatda koronavirusga chalinganlar va buning oqibatida vafot etganlar soni osha boshladi.
Izoh (0)