AQShda demokratlar Kongress ustidan nazoratni qo‘lga kiritdi

AQSh Demokratik partiyasi Jorjiya shtatida Senatga saylovlarning ikkinchi bosqichida ikkita mandatni qo‘lga kiritdi, shu tariqa Kongressning ikkala palatasi ustidan to‘liq nazorat o‘rnatdi, deb xabar bermoqda The New York Times.

Demokratlardan nomzodlar Jon Ossoff va Rafael Uornok amaldagi senatorlar — respublikachi Kelli Loffler va David Perdyu ustidan g‘alaba qozongan. Ular tegishli ravishda ovozlarning 50,4 va 50,8 foizini qo‘lga kiritgan. Rafael Uornok Jorjiya shtatining butun tarixi davomida ushbu shtatdan chiqqan birinchi qora tanli senator bo‘ladi.

Financial Times aniqlik kiritishicha, Ossoff va Uornokning g‘alabasi shuni anglatadiki, Senat yangi tarkibidagi 100 ta o‘rin ikkita partiya o‘rtasida teppa-teng bo‘lib olinadi, vitse-prezident lavozimiga kirishadigan Kamala Xarris esa hal qiluvchi ovozga ega bo‘ladi.

“Demokratlarning nazoratga ega bo‘lishi Jo Baydenning oy oxirida lavozimiga kirishganidan keyin siyosiy kun tartibini amalga oshirish imkoniyatlarini ko‘paytiradi”, — deb yozadi nashr.

AQSh Kongressi — Senat va Vakillar palatasidan iborat qonun chiqaruvchi organ. Senat 100 kishidan iborat, Vakillar palatasida 435 ta o‘rin bor. Noyabrdagi saylovlar yakunlariga ko‘ra, demokratlar Kongressning quyi palatasida 222 ta, respublikachilar 211 ta o‘rinni qo‘lga kiritgan edi.

Eslatib o‘tamiz, AQSh Kongressi 7-yanvar kungi majlisda Jo Baydenning 46-AQSh prezidenti etib saylanganini rasman tasdiqladi. U saylovchilar hay’atining 306 ta ovoziga ega bo‘ldi. Amaldagi prezident Donald Trampning tarafdorlari 6-yanvar kuni Kongress saylovlar natijalarini tasdiqlayotgan paytda Kongress binosini shiddatli hujum bilan egallab oldi. Ovozlarni sanash to‘xtatildi va bir necha soatdan keyin yana davom ettirildi.