AQShning amaldagi prezidenti Donald Tramp o‘z tarafdorlarining Kapitoliydagi namoyishlari va Kongress binosiga bostirib kirish paytida yuz bergan zo‘ravonliklarni qoraladi. Bu haqda Tramp o‘zining Twitter’dagi akkauntiga joylashtirgan videomurojaatida ma’lum qilgan. Bu ijtimoiy tarmoq uning akkauntini bloklaganidan so‘ng, prezident tomonidan e’lon qilingan birinchi post hisoblanadi.
Tramp miting vaqtida qonunni buzganlar buning uchun “javob berishi”ni va’da qilgan. Shuningdek, u o‘sha kuni zo‘ravonlik ishlatganlar AQSh vakillari emasligini ma’lum qilgan.
“Yaqindagina intensiv saylovlardan o‘tdik, hissiyotlarimiz qaynoq, ammo hozir bu kabi hissiyotlarni susaytirib, xotirjamlikni qayta tiklash kerak”, — deydi Tramp.
U hokimiyatni yangi administratsiyaga qonuniy va tinch yo‘l bilan topshirishga e’tiborini qaratishga va’da bergan. Prezidentning so‘zlariga ko‘ra, Baydenning inauguratsiyasi rejalashtirilganidek 20-yanvar kuni bo‘lib o‘tadi.
Prezident saylov natijalarini sud orqali bekor qilishga urinishi, yagona maqsadi, saylovlar butunligini saqlab qolish bo‘lganini tushuntirdi. Tramp “amerikacha demokratiyani himoya qilish” zarurati yuzasida harakat qilganini bildirgan. Shuningdek, u hamon saylov qonunchiligiga o‘zgartirish kiritish zarurligiga ishonchi komilligini ma’lum qilgan.
Eslatib o‘tamiz, 6-yanvar kuni Donald Trampning tarafdorlari soqchilar zanjirini yorib o‘tib, Vashingtondagi AQSh Kongressi binosiga bostirib kirdi. Ular prezident saylovlari natijalarini tasdiqlashga bag‘ishlangan kongress majlisini to‘xtatib qo‘ydi. Kongressmenlarning bir qismi Kapitoliydan evakuatsiya qilindi. Vashingtonda komendantlik soati e’lon qilindi, tartibni saqlash uchun AQSh poytaxtiga Milliy gvardiya kuchlari kiritildi. To‘qnashuvlarda to‘rt kishi halok bo‘lgani aytilmoqda.
Vakillar palatasining sud ishlari bo‘yicha qo‘mitasi rahbari Jerri Nadler, palata spikeri Nensi Pelosi Donald Trampga soddalashtirilgan tartibda impichment e’lon qilish taklifi bilan chiqdi.
Izoh (0)