“Metsenat.uz” loyihasi doirasida Qashqadaryo viloyati hokimligi tomonidan innovatsion loyihalar uchun ijtimoiy grant e’lon qilindi. Grant 6 ta yo‘nalish bo‘yicha o‘z innovatsion g‘oyalariga ega bo‘lgan talabalar uchun mo‘ljallangan bo‘lib, tanlov doirasida 1 million so‘mdan 100 million so‘mgacha bo‘lgan loyihalar moliyalashtiriladi.
Grantni kimlar qo‘lga kiritishlari mumkin?
Tanlovda qaysi hududdagi oliy ta’lim muassasasida o‘qiyotganidan qat’i nazar doimiy yashash joyi Qashqadaryo viloyatida bo‘lgan barcha talabalar ishtirok etishlari mumkin.
Innovatsion loyihalar quyidagi 6 ta yo‘nalish bo‘yicha qabul qilinadi:
- neft va gaz, kimyo sanoati;
- energetika;
- qishloq xo‘jaligi, oziq-ovqat sanoati;
- suv xo‘jaligi va ekologiya;
- fan va ta’lim;
- IT-texnologiyalar.
Talabalar taklif etayotgan loyihalar qiymati 1 million so‘mdan 100 million so‘mgacha bo‘lishi kerak. Har bir yo‘nalish bo‘yicha tanlov komissiyasi loyiq deb topgan uchtagacha loyihani viloyat hokimligi moliyalashtirish uchun sotib oladi va uni hayotga tatbiq qilish bilan bog‘liq barcha tashkiliy jarayonlarni o‘z zimmasiga oladi.
Shunday qilib, mazkur tanlov natijasiga ko‘ra, jami 1,8 milliard so‘mgacha bo‘lgan innovatsion loyihalarni moliyalashtirish reja qilingan (mazkur miqdor g‘olib bo‘lgan loyihalar budjetiga qarab o‘zgarishi mumkin).
Arizalar 2021-yilning 21-yanvariga qadar “Metsenat.uz” sayti orqali qabul qilinadi.
Tanlov komissiyasi kelib tushgan hujjatlarni ko‘rib chiqadi va maqbul deya topilgan loyihalarni moliyalashtirish to‘g‘risida ijobiy xulosa beradi.
Qanday hujjatlar kerak?
Talabalar eng avvalo “Metsenat.uz” saytida ro‘yxatdan o‘tadi va o‘z ma’lumotlarini kiritadi. Bundan tashqari, sayt orqali innovatsion loyihasi haqida belgilangan namuna asosida qisqacha ma’lumot (1 varaq) hamda loyiha aks etgan taqdimot (10 ta slayddan oshmagan) yuborishlari lozim.
Ma’lumot uchun, bugungi kunga qadar “Metsenat.uz” loyihasida yana uchta ta’lim granti e’lon qilingan edi. Bular:
- Yoshlar ishlari agentligi, Yoshlar ittifoqi va “Mehrli qo‘llar” xayriya fondi tomonidan barcha talabalar uchun jami 400 million so‘mlik grant (ariza topshirishning oxirgi muddati 10-dekabr);
- “Xushnudbek.uz” Telegram kanali tomonidan Toshkent davlat yuridik universiteti talabalari uchun jami 30 million so‘mlik grant (ariza topshirishning oxirgi muddati 14-dekabr);
- “Najot ta’lim” markazi tomonidan tibbiyot sohasida o‘qiyotgan xotin-qizlar uchun jami 15 million so‘mlik grant (ariza topshirishning oxirgi muddati 2021-yil 10-yanvar).
Loyiha bir guruh jamoatchilik faollarining tashabbusi bilan tashkil qilingan. Loyihadan maqsad — O‘zbekistondagi metsenatlarni jalb qilgan holda ehtiyojmand va iqtidorli talabalarning to‘lov-kontraktini to‘lashga yordam berish, shuningdek, stipendiyalar e’lon qilishdan iborat.
Loyiha muallifi Xushnudbek Xudayberdiyevning ma’lum qilishicha, “Metsenat.uz” ijtimoiy loyiha bo‘lib, undan hech qanday tijoriy maqsad ko‘zlanmagan.
Saytning ishlash prinsipi oddiy. Saytda talabalar ro‘yxatdan o‘tib, o‘zlari haqidagi ma’lumotlarni kiritadi va metsenatlar tomonidan e’lon qilingan grant yoki stipendiyalarga onlayn ariza topshiradi.
Izoh (0)