Qamashidagi homilador ayollarni olib o‘tib bo‘lmaydigan jin ko‘prik 5,4 mlrd so‘mga qayta quriladi

Qashqadaryoda homilador ayollarni tug‘ruqxonaga yetkazish uchun daryodan zambilda olib o‘tadigan, jin ko‘prikdan yiqilgan yaqinlari esa nogiron bo‘lib qolayotgan Kaltatoy qishlog‘i aholisining muammosi ijobiy yechim topadigan bo‘ldi. Qishloq aholisi uchun yangi ko‘prik qurib beriladigan bo‘ldi, deya xabar berdi “Daryo” muxbiri.

Ta’kidlanishicha, bu haqda 7-yanvar, payshanba kuni Qarshi shahridagi Jurnalistlar uyida bo‘lib o‘tgan matbuot anjumanida ma’lum qilingan.

Jurnalist va blogerlar ishtirokidagi matbuot anjumanida so‘z olgan viloyat Avtomobil yo‘llari hududiy bosh boshqarmasi bosh muhandisi Bo‘ri Fayziyev Prezident Shavkat Mirziyoyevning 2020-yil 12—13-noyabr kunlari viloyatga tashrifidan so‘ng hududda 39 ta ko‘prik qurilishini, mazkur ko‘priklar uchun mablag‘ respublika budjetidan ajratilishini ma’lum qildi.

Mas’ul “Daryo” muxbirining “Qamashi tumanining Kaltatoy qishlog‘ida joylashgan va 20 yildan beri ta’mirtalabligicha qolayotgan jin ko‘prik respublika budjetidan qurilishi mo‘ljal qilingan 39 ta ko‘prik ichida bormi yoki ro‘yxatga kiritilmaganmi?”, degan savoliga “Qamashidagi ko‘prik viloyatda qurilishi mo‘ljallangan 39 ta ko‘prikdan biri va ko‘prik qurilishiga 5 milliard 400 million so‘m mablag‘ ajratilgan”, deya javob berdi.

Eslatib o‘tamiz, “Daryo” muxbiri bilan 2020-yil may oyida suhbatlashgan qamashiliklar qish va bahor oylarida aholi homilador ayollarni tug‘ruqxonaga yetkazish uchun daryodan ularni zambilda olib o‘tishga majbur bo‘layotganini, jin ko‘prikdan yiqilganlar esa nogiron bo‘lib qolayotganini aytib bergandi.