Toshkent—Termiz xalqaro M39 avtomobil yo‘lining Dehqonobod tumani hududidan o‘tuvchi 13 kilometri qurilishi mablag‘ quruvchilar tomonidan talon-toroj qilingani bois, to‘xtab qolgan. Bu haqda viloyat Avtomobillar yo‘llari bosh boshqarmasi mas’ullari ishtirokida bo‘lib o‘tgan matbuot anjumanida ma’lum qilindi, deya xabar berdi “Daryo” muxbiri.
Matbuot anjumanida aytilishicha, M39 xalqaro avtomobil yo‘lining 60 kilometri Dehqonobod tumani hududidan o‘tgan bo‘lib, bundan ikki yil avval avtomobil yo‘lini tuman markaziga kirmay davom ettiruvchi 13 kilometr qismini qurish ishlari boshlangan va qurilish ishlariga 120 milliard so‘m ajratilgan.
“Biroq, quruvchilar yo‘l uchun ajratilgan 120 milliard so‘mning atigi 30 foizini yo‘lga sarflagan va qurilish ishlari yakuniga yetmay qolgan. Shu bois, ushbu ishga mas’ul bo‘lgan ikkita qurilish tashkiloti mas’ullari javobgarlikka ham tortilgan”, — dedi viloyat Avtomobil yo‘llari bosh boshqarmasi bosh muhandisi Bo‘ri Fayziyev.
Bo‘ri Fayziyevning aniqlik kiritishicha, xalqaro yo‘lning Dehqonobod tumani markazidan o‘tuvchi 13 kilometrini qurish Toshkent shahridagi qurilish tashkilotlariga berilgan bo‘lib, ish hozirgacha chala qolgan.
Mas’ulning qo‘shimcha ma’lumot berishicha, M39 xalqaro avtomobil yo‘lining 1240-kilometri G‘uzor tumani hududidan boshlanib, 1315-kilometri Surxondaryo viloyati chegarasida to‘xtaydi va umumiy uzunlik 75 kilometrni tashkil qiladi. Shu paytga qadar ushbu yo‘lning 21 kilometri ta’mirlangan.
Eslatib o‘tamiz, bundan avval Oliy Majlis deputati, Qonunchilik palatasi Spikeri o‘rinbosari Aktam Hayitov respublika budjetidan yo‘l ta’miri uchun berilgan mablag‘ning 180 milliard so‘mi belgilangan muddatda sarflanmay qolganini, Qashqadaryo viloyatining Dehqonobod tumani markaziga olib kiruvchi M39 xalqaro yo‘li esa ta’mirtalabligicha qolayotganini ma’lum qilgani haqida xabar berilgandi.
Izoh (0)