20-yanvar — O‘zbekistondagi kollej va texnikumlarga kontrakt asosida o‘qishga kirgan o‘quvchilarga to‘lovning kamida 50 foizini to‘lash uchun oxirgi kun etib belgilandi. Bu haqda Oliy va o‘rta maxsus ta’lim vazirligi matbuot xizmati xabar berdi.
Eslatib o‘tamiz, texnikumlarga hujjatlarni qabul qilish boshlangani haqida Oliy va o‘rta-maxsus ta’lim vazirligi 2020-yil avgust oyining oxirida ma’lum qilgandi. O‘zbekistondagi kollejlarga qabul kvotalari esa sentabr oyining boshida tasdiqlangandi. 2020/2021-o‘quv yili O‘zbekistonda yangicha tizimdagi o‘rta maxsus ta’limning ilk yili sanaladi.
Jami 201 ta kollej va 185 ta texnikumga kirish imtihonlari 20—30-noyabr kunlari bo‘lib o‘tgan. Imtihon natijalari 17-dekabr kuni e’lon qilingan.
2021-yil kollej va texnikumlarga umumiy 154 765 o‘quvchini qabul qilish rejalashtirilgan. Shulardan 86 foizi to‘lov-kontrakt asosida o‘qiydi.
Oktabr oyida kontrakt miqdori ta’lim yo‘nalishiga qarab yiliga 3,9—4,2 million so‘m bo‘lishi e’lon qilingan. Kontrakt summasi mehnatga haq to‘lashning eng kam miqdoriga nisbatan belgilangan.
Izoh (0)