Andijonda 2020-yilda eng ko‘p qonunbuzilishiga yo‘l qo‘ygan tashkilotlar nomi ma’lum qilindi

Andijon viloyatidagi tashkilotlar 2020-yilda 30 571 ta qonunbuzilishiga yo‘l qo‘ygan, deya xabar berdi “Daryo” muxbiri Umidjon Mamarasulov.

Viloyat adliya boshqarmasi boshlig‘ining birinchi o‘rinbosari Otabek Bozorovning aniqlashtirishicha, shahar va tuman adliya bo‘limlari tomonidan 2020-yilda jami 287 ta huquqni qo‘llash amaliyoti o‘rganilgan bo‘lib, natijada 30 571 ta qonunbuzilish holati aniqlangan. Ularni bartaraf etish yuzasidan tegishli tashkilotlarga 1 295 ta taqdimnoma kiritilgan.

“Taqdimnomalar natijasida fuqarolarga 7 milliard 689 million so‘m miqdoridagi mablag‘lar qaytarilgan. Shuningdek, o‘rganishlar davomida 76 ta hujjat ijrosi to‘xtatilgan va 33 ta hujjat bekor qilingan. Bundan tashqari 14 nafar mansabdor shaxsning noqonuniy harakatlari to‘xtatilib, 489 nafar shaxs intizomiy javobgarlikka tortilgan. 21 nafar mutaxassis bilan tuzilgan mehnat shartnomalari bekor qilingan. Bundan tashqari, bo‘limlar tomonidan turli tashkilotlarga qonunbuzilish holatlariga yo‘l qo‘ymaslik yuzasidan 4 126 ta ogohlantirish berilgan”, — deydi Otabek Bozorov.

Otabek Bozorov, shuningdek, 2020-yil davomida boshqarmaga kelib tushgan murojaatlarning 3 865 tasi ijobiy hal etilganini bildirdi.

“Yil davomida jismoniy va yuridik shaxslardan jami 4 271 ta murojaat kelib tushgan bo‘lib, uning 3 865 tasi qonuniy hal etilgan. Murojaatlarning 2 647 tasi inson huquqlarini himoya qilish, 305 tasi huquqiy xizmat ko‘rsatishni davlat tomonidan tartibga solish, 692 tasi ijtimoiy-iqtisodiy sohada huquqni qo‘llash amaliyoti hamda 627 tasi boshqa sohalarga oid bo‘lib, ular asosida turli davlat va nodavlat tashkilotlarga 285 ta taqdimnoma, sudlarga 480 ta da’vo arizasi va 45 ta ma’muriy takliflar kiritilgan”, — deydi Otabek Bozorov.

Bo‘lim boshlig‘i Sarvar Qobiljonovning qo‘shimcha qilinishicha, qonunbuzilish holatlari bo‘yicha birinchi beshlikdan 4300 dan ortiq holat bilan ijtimoiy ta’minot, 3500 dan ortiq qonunbuzish bilan yer resurslari va davlat kadastri idoralari, 3000 ta holat bilan ta’lim muassasalari, 2500 ta holat bilan sog‘liqni saqlash muassasalari hamda 2400 ta holat bilan shahar va tuman hokimliklari joy olgan.