«Metsenat.uz» лойиҳаси доирасида Қашқадарё вилояти ҳокимлиги томонидан инновацион лойиҳалар учун ижтимоий грант эълон қилинди. Грант 6 та йўналиш бўйича ўз инновацион ғояларига эга бўлган талабалар учун мўлжалланган бўлиб, танлов доирасида 1 миллион сўмдан 100 миллион сўмгача бўлган лойиҳалар молиялаштирилади.
Грантни кимлар қўлга киритишлари мумкин?
Танловда қайси ҳудуддаги олий таълим муассасасида ўқиётганидан қатъи назар доимий яшаш жойи Қашқадарё вилоятида бўлган барча талабалар иштирок этишлари мумкин.
Инновацион лойиҳалар қуйидаги 6 та йўналиш бўйича қабул қилинади:
- нефть ва газ, кимё саноати;
- энергетика;
- қишлоқ хўжалиги, озиқ-овқат саноати;
- сув хўжалиги ва экология;
- фан ва таълим;
- IT-технологиялар.
Талабалар таклиф этаётган лойиҳалар қиймати 1 миллион сўмдан 100 миллион сўмгача бўлиши керак. Ҳар бир йўналиш бўйича танлов комиссияси лойиқ деб топган учтагача лойиҳани вилоят ҳокимлиги молиялаштириш учун сотиб олади ва уни ҳаётга татбиқ қилиш билан боғлиқ барча ташкилий жараёнларни ўз зиммасига олади.
Шундай қилиб, мазкур танлов натижасига кўра, жами 1,8 миллиард сўмгача бўлган инновацион лойиҳаларни молиялаштириш режа қилинган (мазкур миқдор ғолиб бўлган лойиҳалар бюджетига қараб ўзгариши мумкин).
Аризалар 2021 йилнинг 21 январига қадар «Metsenat.uz» сайти орқали қабул қилинади.
Танлов комиссияси келиб тушган ҳужжатларни кўриб чиқади ва мақбул дея топилган лойиҳаларни молиялаштириш тўғрисида ижобий хулоса беради.
Қандай ҳужжатлар керак?
Талабалар энг аввало «Metsenat.uz» сайтида рўйхатдан ўтади ва ўз маълумотларини киритади. Бундан ташқари, сайт орқали инновацион лойиҳаси ҳақида белгиланган намуна асосида қисқача маълумот (1 варақ) ҳамда лойиҳа акс этган тақдимот (10 та слайддан ошмаган) юборишлари лозим.
Маълумот учун, бугунги кунга қадар «Metsenat.uz» лойиҳасида яна учта таълим гранти эълон қилинган эди. Булар:
- Ёшлар ишлари агентлиги, Ёшлар иттифоқи ва «Меҳрли қўллар» хайрия фонди томонидан барча талабалар учун жами 400 миллион сўмлик грант (ариза топширишнинг охирги муддати 10 декабрь);
- «Xushnudbek.uz» Telegram канали томонидан Тошкент давлат юридик университети талабалари учун жами 30 миллион сўмлик грант (ариза топширишнинг охирги муддати 14 декабрь);
- «Нажот таълим» маркази томонидан тиббиёт соҳасида ўқиётган хотин-қизлар учун жами 15 миллион сўмлик грант (ариза топширишнинг охирги муддати 2021 йил 10 январь).
Лойиҳа бир гуруҳ жамоатчилик фаолларининг ташаббуси билан ташкил қилинган. Лойиҳадан мақсад — Ўзбекистондаги меценатларни жалб қилган ҳолда эҳтиёжманд ва иқтидорли талабаларнинг тўлов-контрактини тўлашга ёрдам бериш, шунингдек, стипендиялар эълон қилишдан иборат.
Лойиҳа муаллифи Хушнудбек Худайбердиевнинг маълум қилишича, «Metsenat.uz» ижтимоий лойиҳа бўлиб, ундан ҳеч қандай тижорий мақсад кўзланмаган.
Сайтнинг ишлаш принципи оддий. Сайтда талабалар рўйхатдан ўтиб, ўзлари ҳақидаги маълумотларни киритади ва меценатлар томонидан эълон қилинган грант ёки стипендияларга онлайн ариза топширади.
Изоҳ (0)