Андижонда 2020 йилда энг кўп қонунбузилишига йўл қўйган ташкилотлар номи маълум қилинди

Андижон вилоятидаги ташкилотлар 2020 йилда 30 571 та қонунбузилишига йўл қўйган, дея хабар берди «Дарё» мухбири Умиджон Мамарасулов.

Вилоят адлия бошқармаси бошлиғининг биринчи ўринбосари Отабек Бозоровнинг аниқлаштиришича, шаҳар ва туман адлия бўлимлари томонидан 2020 йилда жами 287 та ҳуқуқни қўллаш амалиёти ўрганилган бўлиб, натижада 30 571 та қонунбузилиш ҳолати аниқланган. Уларни бартараф этиш юзасидан тегишли ташкилотларга 1 295 та тақдимнома киритилган.

«Тақдимномалар натижасида фуқароларга 7 миллиард 689 миллион сўм миқдоридаги маблағлар қайтарилган. Шунингдек, ўрганишлар давомида 76 та ҳужжат ижроси тўхтатилган ва 33 та ҳужжат бекор қилинган. Бундан ташқари 14 нафар мансабдор шахснинг ноқонуний ҳаракатлари тўхтатилиб, 489 нафар шахс интизомий жавобгарликка тортилган. 21 нафар мутахассис билан тузилган меҳнат шартномалари бекор қилинган. Бундан ташқари, бўлимлар томонидан турли ташкилотларга қонунбузилиш ҳолатларига йўл қўймаслик юзасидан 4 126 та огоҳлантириш берилган», — дейди Отабек Бозоров.

Отабек Бозоров, шунингдек, 2020 йил давомида бошқармага келиб тушган мурожаатларнинг 3 865 таси ижобий ҳал этилганини билдирди.

«Йил давомида жисмоний ва юридик шахслардан жами 4 271 та мурожаат келиб тушган бўлиб, унинг 3 865 таси қонуний ҳал этилган. Мурожаатларнинг 2 647 таси инсон ҳуқуқларини ҳимоя қилиш, 305 таси ҳуқуқий хизмат кўрсатишни давлат томонидан тартибга солиш, 692 таси ижтимоий-иқтисодий соҳада ҳуқуқни қўллаш амалиёти ҳамда 627 таси бошқа соҳаларга оид бўлиб, улар асосида турли давлат ва нодавлат ташкилотларга 285 та тақдимнома, судларга 480 та даъво аризаси ва 45 та маъмурий таклифлар киритилган», — дейди Отабек Бозоров.

Бўлим бошлиғи Сарвар Қобилжоновнинг қўшимча қилинишича, қонунбузилиш ҳолатлари бўйича биринчи бешликдан 4300 дан ортиқ ҳолат билан ижтимоий таъминот, 3500 дан ортиқ қонунбузиш билан ер ресурслари ва давлат кадастри идоралари, 3000 та ҳолат билан таълим муассасалари, 2500 та ҳолат билан соғлиқни сақлаш муассасалари ҳамда 2400 та ҳолат билан шаҳар ва туман ҳокимликлари жой олган.