O‘zbekistonda koronavirusga qarshi vaksina sinovida qatnashmoqchi bo‘lgan ko‘ngillilarning 30 foizi kasallikni o‘zi bexabar holda simptomlarsiz o‘tkazgani ma’lum bo‘ldi

Xitoy olimlari tomonidan ishlab chiqilgan koronavirusga qarshi rekombinant vaksinaning 3-bosqich sinovlarida ko‘ngilli sifatida ishtirok etish uchun ariza bergan o‘zbekistonliklarning 30 foizida koronavirusga qarshi antitanalar borligi aniqlandi. Bu haqda O‘zbekiston innovatsion rivojlanish vaziri Ibrohim Abdurahmonov “Daryo”ga bergan intervyusida ma’lum qildi.

Vazirning so‘zlariga ko‘ra, 18-dekabrdan 6-yanvargacha vaksina sinovida ko‘ngilli sifatida ishtirok etish istagini bildirgan 3 ming nafar fuqaro ko‘rikdan o‘tkazilgan va ulardan faqat 1 270 nafari — “hech birida shubhali kasalliklari yo‘q” ko‘ngillilar “o‘z xohish va roziliklari bilan, tadqiqot shartnomasi imzo qo‘yib”, emlangan. Ma’lumot uchun, Xitoy tomoni O‘zbekistondagi sinovlar uchun 5 ming doza vaksina taqdim etgan.

Vaksina olish istagidagi fuqarolarning har biri bilan suhbatlashib, ularning kasallik tarixi, psixologik holati o‘rganilyapti. Murojaat qilayotgan ko‘ngillilar birinchi kuni tibbiy ko‘rikdan o‘tkazilib, koronavirusga test olinyapti, antitanalari tekshirilmoqda. Ikkinchi kuni emlanyapti.

Ko‘ngillilar bilan suhbat chog‘ida fuqarolardan tibbiy holatlari to‘g‘risida ma’lumot olinadi, xususan, avval COVID-19 kasalligiga chalingan-chalinmagani so‘raladi — koronavirus bilan og‘rigan kishilarda sinov o‘tkazilmaydi. Shu suhbat jarayonining o‘zida taxminan 10 foiz ko‘ngilli emlashdan voz kechmoqda yoki tibbiy ko‘rsatmalarga ko‘ra ularning vaksina olishi rad etilmoqda.

Suhbatdan o‘tgan murojaatchilardan qon tahlili olinadi. Shu bosqichda qon tahlili topshirganlardan taxminan 30 foizining organizmida koronavirusga qarshi antitanalar borligi aniqlanmoqda. Bular koronavirusni o‘zi bilmagan holda, alomatlarsiz yengib o‘tgan shaxslar hisoblanadi. Ular sog‘lom bo‘lishiga qaramay, emlanishga jalb qilinmayapti. Chunki bu vaksina samarasini tekshirishga xalal beradi.

Tibbiy ko‘rikdan o‘tib, vaksina olishga loyiq, deb topilganlarga yana bir bor qayta o‘ylab ko‘rishlari uchun bir kun imkoniyat beryapmiz — hech kim ularni emlanishga majbur qilmaydi. Hozirgacha 10 foiz ko‘ngilli ikkilangan holda emlanishdan voz kechdi.

Ibrohim Abdurahmonov, O‘zbekiston innovatsion rivojlanish vaziri

Ayni vaqtda, Sog‘liqni saqlash vazirligi rasmiylari ham, hukumatning boshqa idoralari mansabdorlari ham O‘zbekistonda COVID-19 bilan bog‘liq haqiqiy holat rasmiy statistikadagi raqamlardan bir necha barobar katta bo‘lishi mumkinligini ta’kidlaydi.

Qayd etish joiz, avvalroq SSV huzuridagi koronavirusga qarshi kurash shtabi a’zosi, professor Nurmat Otabekov O‘zbekistonda aholining 70 foizida koronavirusga qarshi immunitet shakllansa, “pandemiyani yengishimiz” mumkinligini ma’lum qilgan edi.