Adliya vazirligi mas’uli: “Oxirgi uch yilda sud ishlarida advokatlarga davlat hisobidan 42,5 mlrd so‘m to‘lab berildi”

Sud ishlarida davlat tomonidan belgilangan advokatlarga yuridik yordami uchun so‘nggi uch yilda davlat hisobidan 42,5 milliard, bir yilda o‘rtacha 14 milliard so‘mdan ortiq mablag‘ to‘lab berilgan. Bu haqda Adliya vazirligi boshqarma boshlig‘i o‘rinbosari Eldor Mahkamov 27-oktabr kuni AOKAda bo‘lib o‘tgan brifingda ma’lum qildi.

“Davlat hisobidan yuridik yordam ko‘rsatishda advokatning ishtiroki, surishtiruvchi, tergovchi, prokuror yoki sud tomonidan Advokatlar palatasining hududiy boshqarmasi tomonidan belgilangan advokatlik tuzilmasiga murojaat yuborish yo‘li bilan ta’minlanadi. Oxirgi uch yilda jami 222 652 ta, bir yilda o‘rtacha 74 217 ta jinoyat ishlari bo‘yicha advokatlar tayinlov asosida davlat hisobidan ishtirok etishgan”, – dedi Eldor Mahkamov.

Advokatlarga quyidagi holatlarda to‘lov davlat hisobidan qoplab beriladi:

• oilasida har bir oila a’zosiga to‘g‘ri keladigan yalpi oylik daromad mehnatga haq to‘lashning eng kam miqdorining 52,70 foizidan (bugungi kunda 358 ming so‘m) ortiq bo‘lmagan shaxslar uchun;
• gumon qilinuvchi, ayblanuvchi va sudlanuvchi himoyachidan voz kechishi bilan bog‘liq protsessual harakatda advokat ishtirok etishi hollarida, shuningdek, Jinoyat-protsessual kodeksiga muvofiq jinoyat ishida himoyachining qatnashishi majburiy deb hisoblangan hollarda.

Shuningdek, advokatlar tomonidan yuridik yordam ko‘rsatilgani uchun to‘lov ham belgilangan. Bunda quyidagi miqdorda amalga oshiriladi:

• surishtiruv jarayonida, dastlabki tergov bosqichida, birinchi instansiya sudlarida va apellyatsiya, kassatsiya yoki nazorat tartibida ko‘rilayotgan ishlarda to‘lov har bir kun uchun — 111 500 so‘m;
• sud majlisining har bir tanaffus kuni uchun — 55 750 so‘m;
• dam olish va bayram (ishlanmaydigan) kunlari — 223 000 so‘m;
• tungi vaqtda — 167 250 so‘m qilib belgilangan.