O‘zbekiston Adliya vazirligi tomonidan 6-yanvar kuni bosh tashkiloti AQShda joylashgan Vinrok xalqaro qishloq xo‘jaligini rivojlantirish institutining O‘zbekistondagi filiali davlat ro‘yxatidan o‘tkazildi. Bu haqda idora matbuot xizmati xabar berdi.
“Filialning asosiy maqsad va vazifalari – ovqatlanish va ijtimoiy-iqtisodiy farovonlikni yaxshilashga, tola va yoqilg‘i, shu jumladan, chorvachilik, oziq-ovqat va nooziq-ovqat mahsulotlarini ishlab chiqarish, tarqatish hamda tabiiy resurslarni boshqarishni takomillashtirishga ko‘maklashishdir”, — deyiladi xabarda.
Shuningdek, filial AQSh Xalqaro rivojlanish agentligi (USAID) tomonidan moliyalashtiriladigan “Markaziy Osiyoda xavfsiz migratsiya” (SMICA, 2019—2024) loyihasini amalga oshirishga ko‘maklashadi. O‘zbekistonda odam savdosining oldini olish, omon qolgan jabrlanuvchilarni himoya qilish, xavfsiz migratsiyaga ko‘maklashish, xavf ostida bo‘lgan aholi qatlamining odam savdosining barcha shakllariga nisbatan zaifligini kamaytirishga hamda odam savdosi jabrlanuvchilariga yordam berish va aniqlash usullarini rivojlantirishga ko‘maklashishga qaratilgan ushbu loyiha budjeti 2,34 million AQSh dollarini tashkil etadi.
Winrock saytining ma’lumotlariga ko‘ra, tashkilot dunyoning 46 ta davlatida qishloq xo‘jaligi, atrof-muhit va ijtimoiy rivojlanish sohalari bo‘yicha 140 dan ortiq loyihalarni amalga oshirib keladi.
“Kommersant”ning yozishicha, tashkilot bunga qadar ham O‘zbekistonda faoliyat ko‘rsatgan. 2006-yilda Toshkent sudining qarori bilan uning vakolatxonasi “vakolatxona faoliyatining belgilangan ustuvor vazifalarga mos kelmasligi” bo‘yicha yopilgan edi.
Izoh (0)